فیفا نے اعتزاز حسین کو پاکستان کی نمائندگی کی اجازت دے دی

ناروے …فٹبال کی عالمی تنظیم فیفا نے ناروے میں کھیلنے والے پاکستانی نژاد مڈفیلڈر اعتزاز حسین کو پاکستان کی نمائندگی کے لیے اہل قرار دے دیا ہے۔32 سالہ اعتزاز حسین نے دو سال قبل پاکستانی پاسپورٹ حاصل کیا تھا۔ وہ ناروے کے معروف کلب مولڈے ایف کے کے ساتھ کھیلتے رہے ہیں اور اسی دوران ایرلنگ ہالینڈ کے ساتھ بھی میدان میں اتر چکے ہیں۔ اعتزاز نے مولڈے کے ساتھ چار بار لیگ اور تین بار ناروے ایف اے کپ ٹائٹلز اپنے نام کیے۔اعتزاز حسین انڈر 16 سے انڈر 23 تک مختلف ایج گروپ مقابلوں میں ناروے کی نمائندگی کر چکے ہیں، جبکہ 2009 سے 2011 تک وہ مانچسٹر یونائیٹڈ یوتھ اسکواڈ کا بھی حصہ رہے۔امید کی جا رہی ہے کہ اعتزاز حسین اکتوبر میں اسلام آباد کے جناح اسٹیڈیم میں افغانستان کے خلاف شیڈول میچ میں پہلی بار پاکستان کے لیے میدان میں اتریں گے۔