ٹک ٹاکر سامعہ حجاب کو دھمکیاں دینے والا شخص گرفتار

اسلام آباد…اسلام آباد پولیس نے ٹک ٹاکر سامعہ حجاب کو ہراساں کرنے، قتل اور اغوا کی دھمکیاں دینے کے الزام میں حسن زاہد نامی شخص کو گرفتار کر لیا۔ پولیس ترجمان کے مطابق کارروائی سامعہ حجاب کی شکایت اور ویڈیو بیان موصول ہونے کے بعد عمل میں لائی گئی۔ترجمان کے مطابق تھانہ شالیمار میں درج مقدمے میں پاکستان پینل کوڈ کی دفعات 354 (خواتین کی عزت مجروح کرنے کی نیت سے حملہ یا زبردستی)، 365 (اغوا)، 392 (ڈکیتی)، 500 (ہتکِ عزت)، 509 (خواتین کو ہراساں کرنے) اور 511 (ناکام مجرمانہ کوشش) شامل کی گئی ہیں۔تفصیلات کے مطابق ملزم کئی روز سے سامعہ حجاب کا پیچھا کر رہا تھا اور بار بار تحائف دے کر دبا ڈالنے کی کوشش کرتا رہا۔