افغانستان میں شدید زلزلہ، 800 سے زائد ہلاک اور ہزاروں زخمی

کابل …افغانستان کے صوبہ کنڑ میں رات گئے آنے والے شدید زلزلے نے شدید تباہی مچادی۔ ابتدائی اطلاعات کے مطابق اب تک 800 افراد جان کی بازی ہار چکے ہیں اور تین ہزار سے زائد زخمی ہوئے ہیں۔طلوع نیوز کے مطابق زلزلے کا مرکز جلال آباد کے 8 کلومیٹر زیرِ زمین تھا اور شدت 6 ریکارڈ کی گئی۔ زلزلے کے بعد مزید پانچ آفٹر شاکس محسوس کی گئیں جن کی شدت 4.3 سے 5.2 کے درمیان رہی۔نورگل، سواکئی، واٹاپور، منوگی اور چپہ درہ اضلاع سب سے زیادہ متاثر ہوئے، جہاں کئی گاں مٹی کے تلے دب گئے ہیں اور سیکڑوں افراد کے ابھی بھی ملبے تلے پھنسے ہونے کا خدشہ ہے۔ امدادی کارروائیاں جاری ہیں، اور وزارتِ دفاع، داخلہ اور صحت کی ٹیمیں موقع پر پہنچ چکی ہیں۔ زخمیوں کو ہیلی کاپٹر کے ذریعے ننگرہار ریجنل اسپتال منتقل کیا جا رہا ہے۔اسلامی امارتِ افغانستان کے ترجمان ذبیح اللہ مجاہد نے حکام کو ہدایت کی ہے کہ متاثرین کی جانیں بچانے کے لیے اپنی تمام تر صلاحیتیں بروئے کار لائیں۔ زلزلے کے جھٹکے ننگرہار، لغمان، کابل اور خیبر پختونخوا کے بعض علاقوں میں بھی محسوس کیے گئے۔