پاکستان کے چار شہروں میں پولیو وائرس کی تصدیق، 2 کروڑ 80 لاکھ بچوں کو قطرے پلانے کی مہم

اسلام آباد…پاکستان کے چار مختلف علاقوں سے لیے گئے ماحولیاتی نمونوں میں خطرناک ٹائپ-1 پولیو وائرس کی موجودگی کی تصدیق ہوگئی ہے۔نیشنل انسٹی ٹیوٹ آف ہیلتھ (این آئی ایچ) کی ریجنل ریفرنس لیبارٹری کے مطابق دیامر، جنوبی وزیرستان، لاہور اور راولپنڈی سے مجموعی طور پر 15 نمونے حاصل کیے گئے تھے، جن میں سے 10 میں پولیو وائرس پایا گیا۔ ماہرین کے مطابق ٹائپ-1 پولیو وائرس سب سے خطرناک قسم سمجھی جاتی ہے۔پولیو مہم کے حوالے سے نیشنل ایمرجنسی آپریشن سینٹر (این ای او سی) کا کہنا ہے کہ ملک بھر میں انسدادِ پولیو مہم یکم ستمبر سے 7 ستمبر تک جاری رہے گی، جس کے دوران 5 سال سے کم عمر کے 2 کروڑ 80 لاکھ بچوں کو قطرے پلائے جائیں گے۔یہ مہم 99 اضلاع میں بیک وقت شروع کی جائے گی۔ این ای او سی نے والدین سے اپیل کی ہے کہ وہ مہم کے دوران بھرپور تعاون کریں اور اپنے بچوں کو پولیو سے بچا کے قطرے لازمی پلائیں تاکہ اس مہلک وائرس کا مکمل خاتمہ ممکن بنایا جا سکے۔