فلسطینی وزیراعظم محمد مصطفی نے اقوام متحدہ کی سلامتی کونسل سے اپیل کی ہے کہ وہ اسرائیل کو غزہ میں نسل کشی روکنے اور جنگ بندی پر مجبور کرنے کے لیے قرارداد پیش کرے۔
ریاض میں اسلامی تعاون تنظیم اور عرب لیگ کے مشترکہ سربراہی اجلاس سے خطاب کرتے ہوئے مصطفی نے کہا کہ اقوام متحدہ کے چارٹر کی ساتویں قرارداد کے تحت سلامتی کونسل کو ایک ایسی قرارداد منظور کرنی چاہیے جو اسرائیل پر غزہ میں جنگ بندی نافذ کرے، فوری انسانی امداد کی فراہمی کو یقینی بنائے، اور سلامتی کونسل کی موجودہ قراردادوں پر عمل درآمد کرائے۔
مصطفی نے اسرائیل کے فلسطینی علاقے پر غیر قانونی قبضے کے خاتمے کے لیے بین الاقوامی سطح پر اقدامات اور پابندیاں لگانے کی ضرورت پر زور دیا۔ انہوں نے صدر محمود عباس کے امن کے لیے بین الاقوامی کانفرنس کی کوششوں کی حمایت کی اور فلسطینی ریاست کی اقوام متحدہ میں مکمل رکنیت کے لیے بھی سلامتی کونسل میں قرارداد پیش کرنے کا مطالبہ کیا۔
فلسطینی وزیراعظم نے عالمی عدالت انصاف سے اسرائیل کے خلاف نسل کشی کے مقدمے میں فوری کارروائی کرنے کی اپیل کرتے ہوئے کہا کہ عرب اور اسلامی ممالک کو اس مقدمے میں شامل ہو کر اسرائیل کے خلاف قانونی اقدامات کرنا چاہیے۔ انہوں نے مزید کہا کہ عالمی اتحاد کو فلسطینی ریاست کی مکمل شناخت اور دو ریاستی حل کے لیے سیاسی، قانونی اور معاشی اقدامات کرنا چاہیے۔
