بدترین لوڈ شیڈنگ اور مہنگی بجلی سے پریشان شہریوں کے لیے حکومت سندھ کی جانب سے اچھی خبر سامنے آئی ہے۔
وزیر توانائی سندھ ناصر حسین شاہ نے میڈیا سے گفتگو کرتے ہوئے بتایا کہ 100 یونٹ تک کے صارفین کو مفت بجلی فراہم کرنے کا منصوبہ تیار کر لیا گیا ہے۔ پہلے مرحلے میں سولر پارک اور منی گرڈ اسٹیشنز سے عوام کو 100 یونٹ مفت بجلی فراہم کی جائے گی۔
انہوں نے بتایا کہ سندھ حکومت نے نئے مالی سال کے بجٹ میں سولر انرجی اور منی گرڈ کے لیے رقم مختص کر دی ہے۔ ابتدائی طور پر سندھ بجٹ میں سولر انرجی کے لیے 5 ارب روپے مختص کیے جائیں گے۔
انہوں نے یہ بھی بتایا کہ بجٹ میں سولر پینلز انتہائی رعایتی قیمت پر فراہم کرنے کی اسکیم بھی شامل ہے۔ غریب اور متوسط طبقے کو 2 لاکھ سولر پینلز دیے جائیں گے، جن کی قیمت کا 80 فیصد حکومت اور صرف 20 فیصد عوام سے وصول کیا جائے گا۔
وزیر توانائی نے بتایا کہ سندھ میں 5 لاکھ ایسے گھر ہیں جہاں بجلی کی سہولت موجود نہیں ہے۔ کراچی سمیت سندھ بھر میں سولر پارک اور منی گرڈ اسٹیشنز لگائے جائیں گے۔
