باکو میں امریکہ کی 250ویں یومِ آزادی کی تقریب، آذربائیجان اور آرمینیا امن عمل پر گفتگو

باکو( تر کیہ خبر) آذربائیجان کے دارالحکومت باکو میں امریکہ کی آزادی کے 250 سال مکمل ہونے کے موقع پر ایک خصوصی تقریب کا انعقاد کیا گیا۔تقریب کا اہتمام آذربائیجان میں امریکی سفارت خانے کی جانب سے کیا گیا تھا، جس کا آغاز آذربائیجان اور امریکہ کے قومی ترانوں سے کیا گیا۔تقریب سے خطاب کرتے ہوئے امریکی سفارت خانے کی ناظم الامور ایمی کارلون نے کہا کہ گزشتہ 250 برسوں میں امریکہ نے آزادی، جدت، کاروباری ترقی اور معاشی استحکام جیسے اصولوں پر اپنی بنیاد رکھی ہے، اور یہی اقدار ملک کی سائنسی، اقتصادی اور تکنیکی ترقی کا سبب بنی ہیں۔انہوں نے کہا کہ آج دنیا کو ایسے سیاسی حوصلے اور دور اندیش قیادت کی ضرورت ہے جو امن کو فروغ دے۔انہوں نے 8 اگست 2025 کو واشنگٹن میں ہونے والی تاریخی امن سربراہی کانفرنس کا ذکر کرتے ہوئے کہا کہ اس موقع پر صدر ڈونلڈ ٹرمپ کی موجودگی میں آذربائیجان اور آرمینیا نے دہائیوں پر محیط تنازع کے بعد ایک نئے دور کا آغاز کیا اور تعاون، رابطوں اور ترقی پر مبنی مستقبل کی بنیاد رکھنے کا عزم کیا۔ان کے مطابق اس امن کے مثبت اثرات پہلے ہی ظاہر ہونا شروع ہو گئے ہیں۔انہوں نے "ٹرمپ روٹ برائے امن و عالمی ترقی (TRIPP)" اور امریکہ-آذربائیجان اسٹریٹجک شراکت داری کا حوالہ دیتے ہوئے کہا کہ جنوبی قفقاز کو ایک مربوط خطے میں تبدیل کرنے کے لیے تعاون جاری ہے جو مشرق اور مغرب کو جوڑے گا، تجارت کو فروغ دے گا اور توانائی کے شعبے میں استحکام پیدا کرے گا۔انہوں نے مزید بتایا کہ فروری میں آذربائیجان کے صدر الہام علییف اور امریکی نائب صدر جے ڈی وینس کے درمیان دستخط شدہ اسٹریٹجک شراکت داری کا معاہدہ تین بنیادی ستونوں پر مشتمل ہے: علاقائی رابطے، اقتصادی سرمایہ کاری و جدت، اور سلامتی میں تعاون۔