ترک دنیا کا اتحاد ناگزیر، آذربائیجان کا اہم کردار ہے: رکن پارلیمنٹ

باکو( تر کیہ خبر)ترک دنیا کا انضمام موجودہ دور میں انتہائی اہم ہے، عالمی سطح پر بدلتے جغرافیائی سیاسی حالات کے درمیان ترک ریاستوں کی تنظیم مضبوط ہورہی ہے اور نقل و حمل و توانائی کے نئے راستے کھلنے سے باہمی تعاون کے مواقع پیدا ہورہے ہیں۔ آذربائیجان ترک دنیا کے اتحاد میں نمایاں کردار ادا کرنے والے اہم ممالک میں شامل ہے۔یہ بات آذربائیجان کی پارلیمنٹ کی رکن پروانہ ولی ایوا نے آذرتاج کو دیے گئے بیان میں کہی۔انہوں نے برادر اور ہمسایہ ملک ترکیہ کے ساتھ اس نوعیت کی سرگرمیوں کے انعقاد کی اہمیت پر زور دیتے ہوئے کہا کہ آج آذربائیجان اور ترکیہ جامع اتحادی ہیں۔ 2021 میں دستخط ہونے والے شوشا اعلامیے نے دونوں ممالک کے درمیان اس اتحاد کی بنیاد متعین کی۔پروانہ ولی ایوا کے مطابق فوجی اور دفاعی شعبوں میں ترکیہ کے ساتھ تعاون انتہائی اعلیٰ سطح پر ہے، جبکہ اس انضمام کو مزید مضبوط بنانے اور مواصلات سمیت مختلف شعبوں تک وسعت دینے کیلئے نئے تعاون کا آغاز کیا جارہا ہے۔انہوں نے کہا کہ صدر الہام علییف کا یہ مؤقف کہ”ہمارا خاندان ترک دنیا ہے“ اس تزویراتی وژن کی بنیادی عکاسی کرتا ہے۔