آذربائیجان کیخلاف توہین کو ترکیہ کی توہین سمجھتا ہوں: ترک نژاد امریکی انجینئر

 باکو( تر کیہ خبر) امریکی بحریہ اور فضائیہ کے لیے خصوصی مواد تیار کرنے والے ترک نژاد انجینئر ارگون کرلی کووالی نے آذربائیجان کی حمایت میں اپنے مؤقف کی وضاحت کرتے ہوئے کہا ہے کہ وہ ’’ایک قوم، دو ریاستیں‘‘ کے اصول پر مکمل یقین رکھتے ہیں۔امریکی بحریہ اور فضائیہ کے زیر استعمال خصوصی مواد تیار کرنے والے ادارے انٹیگریٹڈ پولیمر انڈسٹریز کے بانی اور بی ٹو بمبار طیاروں کے لیے دفاعی حفاظتی تہہ تیار کرنے والے ارگون کرلی کووالی نے آذربائیجان کی خبر رساں ایجنسی کو خصوصی انٹرویو دیا۔انہوں نے بتایا کہ انہوں نے نسیم نکولس طالب کو خط لکھ کر باکو کا دورہ نہ کرنے کے فیصلے پر تنقید کی، کیونکہ روبن وردانیان کی زیر حراست موجودگی کو اس فیصلے کی وجہ قرار دیا گیا تھا۔ارگون کرلی کووالی نے کہا کہ وہ ’’ایک قوم، دو ریاستیں‘‘ کے نظریے کو دل سے تسلیم کرتے ہیں اور آذربائیجان کی توہین کو ترکیہ اور اپنی ذات کی توہین تصور کرتے ہیں۔ان کے مطابق گزشتہ 50 برس کے دوران وہ سیاست دانوں، صحافیوں، ماہرین تعلیم اور دیگر افراد کو 5 ہزار سے زائد خطوط لکھ چکے ہیں جنہوں نے ان کے بقول ترکوں یا آذربائیجان کی ساکھ متاثر کرنے کی کوشش کی۔انہوں نے کہا کہ ایسے معاملات میں وہ کسی آذربائیجانی ترک کے آواز اٹھانے کا انتظار نہیں کرتے بلکہ اسے اپنی ذمہ داری سمجھتے ہیں کہ جو ضروری ہو، وہ خود کریں۔ ان کا کہنا تھا کہ اپنی یہ ذمہ داری پوری کرنے کے بعد ہی ان کے دل، ذہن اور روح کو سکون ملتا ہے۔انہوں نے مزید کہا کہ امریکا میں مقیم ترک، آذربائیجانی ترک، قازق، ازبک، کرغیز، ترکمان اور اویغور باشندوں میں بھی عمومی طور پر یہی جذبہ پایا جاتا ہے۔