باکو( ترکیہ خبر)آذربائیجان کے نائب وزیرِ خارجہ اور آذربائیجان،امریکا اسٹریٹجک ورکنگ گروپ کے شریک چیئرمین ایلنور محمدوف نے امریکی وفد سے ملاقات کی ہے۔آذربائیجان کی وزارتِ خارجہ کے پریس سروس کے مطابق یہ ملاقات امریکی محکمہ خارجہ کی یورپ اور یوریشیا امور کی معاون نائب سیکریٹری اور اسٹریٹجک ورکنگ گروپ کی امریکی شریک چیئر سوناتا کولٹر کی قیادت میں آنے والے وفد کے ساتھ ہوئی۔ملاقات میں آذربائیجان اور امریکا کے دوطرفہ تعلقات، اسٹریٹجک شراکت داری کے فریم ورک کے تحت تعاون کے فروغ، اقتصادی روابط کی توسیع، توانائی کے تحفظ، علاقائی رابطوں اور باہمی دلچسپی کے دیگر امور پر تفصیلی تبادلہ خیال کیا گیا۔دونوں فریقین نے اسٹریٹجک شراکت داری کو مزید مضبوط بنانے کی اہمیت پر زور دیا اور اس بات پر اتفاق کیا کہ باہمی تعاون میں اضافہ دونوں ممالک کے مفاد میں ہے۔گفتگو کے دوران اس امید کا اظہار بھی کیا گیا کہ دو جون کو باکو میں منعقد ہونے والا آذربائیجان،امریکا اقتصادی مکالمے کا پہلا اجلاس دوطرفہ تعلقات کو مزید فروغ دینے میں اہم کردار ادا کرے گا۔ملاقات میں اقتصادی و تجارتی تعلقات کو وسعت دینے، توانائی اور ٹرانسپورٹ کے شعبوں میں تعاون بڑھانے اور علاقائی استحکام و خوشحالی کے فروغ کے لیے بات چیت جاری رکھنے پر بھی اتفاق کیا گیا۔
