شوشا ترک دنیا کے ثقافتی ورثے کی علامت ہے: ووگار علییف

شوشا( ترکیہ خبر) آذربائیجان کی سرکاری خبر رساں ایجنسی آذرتاج (AZERTAC) کے چیئرمین ووگار علییف نے کہا ہے کہ شوشا نہ صرف آذربائیجان بلکہ پوری ترک دنیا کے ثقافتی ورثے، تاریخی یادداشت اور روحانی یکجہتی کی اہم علامت ہے۔چوتھے شوشا گلوبل میڈیا فورم کے موقع پر ترک خبر رساں ایجنسیوں کے اتحاد (ATNA) کے ایگزیکٹو بورڈ کے اجلاس سے خطاب کرتے ہوئے ووگار علییف نے کہا کہ اتحاد کی سرگرمیوں کا شوشا سے آغاز اور یہاں اہم مشاورت کا انعقاد مستقبل کے لیے مضبوط اخلاقی اور نظریاتی بنیاد فراہم کرتا ہے۔انہوں نے کہا کہ عالمی میڈیا کا منظرنامہ تیزی سے تبدیل ہو رہا ہے، جہاں نئی ٹیکنالوجی، مصنوعی ذہانت، سوشل میڈیا پلیٹ فارمز اور ڈیجیٹل مواصلاتی ذرائع نے خبروں کی تیاری، ترسیل اور استعمال کے طریقہ کار کو یکسر بدل دیا ہے۔ووگار علییف کے مطابق معلومات پہلے سے کہیں زیادہ تیزی سے پھیل رہی ہیں اور عوام کو خبروں تک وسیع رسائی حاصل ہو رہی ہے، تاہم اس کے ساتھ خبر رساں اداروں کو نئی اور پیچیدہ پیشہ ورانہ چیلنجز کا بھی سامنا ہے۔