آذربائیجان اور یورپی یونین کے درمیان نئے جامع معاہدے پر پیش رفت

باکو( ترکیہ خبر) آذربائیجان اور یورپی یونین کے درمیان نئے جامع معاہدے اور 2026 سے 2030 تک کے لیے شراکتی ترجیحات کے حوالے سے مذاکرات کا ایک نیا دور مکمل ہو گیا ہے۔آذربائیجان کی وزارتِ خارجہ کے مطابق یہ مذاکرات دو اور تین جون کو باکو میں منعقد ہوئے جن میں دونوں فریقین کے اعلیٰ سطحی وفود نے شرکت کی۔آذربائیجان کے وفد کی قیادت نائب وزیر خارجہ یلچن ریفییف نے کی جبکہ یورپی یونین کے وفد کی قیادت یورپی خارجہ امور سروس کے نائب ایگزیکٹو ڈائریکٹر اوڈرونے پرکاؤسکینے نے کی۔مذاکرات کو تعمیری اور مثبت قرار دیتے ہوئے بتایا گیا کہ 2026 سے 2030 تک کے لیے شراکتی ترجیحات کے مسودے پر ابتدائی طور پر اتفاق رائے حاصل ہو گیا ہے۔نئے جامع معاہدے کے مختلف حصوں پر تفصیلی بات چیت کی گئی جس میں آذربائیجان کے متعلقہ اداروں اور یورپی یونین کے نمائندوں نے حصہ لیا۔ اس دوران متعدد شعبوں میں پیش رفت ریکارڈ کی گئی اور آئندہ مراحل کے لیے منصوبہ بندی بھی طے کی گئی۔مذاکرات کے اختتام پر دونوں فریقین نے اس بات پر اتفاق کیا کہ نئے دو طرفہ معاہدے پر بات چیت کو آن لائن اور براہ راست اجلاسوں کے ذریعے تیزی سے جاری رکھا جائے گا۔