عالمی مسائل کے حل میں پارلیمانوں کا کردار اہم ہے:صاحبہ غفارووا

 باکو( تر کیہ خبر)جنوبی افریقہ کے دورے کے دوران آذربائیجان کی ملی مجلس کی اسپیکر صاحبہ غفارووا نے مڈرانڈ میں قومی اور علاقائی پارلیمانوں کے اسپیکرز کی کانفرنس میں شرکت کی۔پین افریقی پارلیمنٹ کی میزبانی میں ہونے والی اس کانفرنس میں افریقی ممالک کی قومی اور علاقائی قانون ساز اسمبلیوں کے سربراہان، بین الاقوامی پارلیمانی اداروں کے عہدیداران اور نمائندگان شریک ہوئے۔کانفرنس سے خطاب کرتے ہوئے صاحبہ غفارووا نے دنیا میں ہونے والی تیز رفتار تبدیلیوں، جاری تنازعات، معاشی عدم مساوات اور موسمیاتی چیلنجز پر روشنی ڈالی۔ انہوں نے کہا کہ ایسے وقت میں جب عالمی اداروں پر اعتماد کو دباؤ کا سامنا ہے، عالمی فیصلوں کے عمل میں پارلیمانوں کا کردار مزید مؤثر ہونا چاہیے۔انہوں نے کہا کہ پارلیمان عوام کی نمائندگی کرتی ہیں، قومی ترجیحات کو عالمی ایجنڈے سے جوڑتی ہیں اور قانون سازی و عملی اقدامات کے ذریعے سیاسی وعدوں پر عملدرآمد میں مددگار ثابت ہوتی ہیں۔آذربائیجانی اسپیکر نے عالمی چیلنجز سے نمٹنے میں پارلیمانوں کے بڑھتے ہوئے کردار کو اجاگر کرتے ہوئے کہا کہ یہ ادارے نہ صرف قومی قوانین مرتب کرتے ہیں بلکہ بین الاقوامی تعاون کے فروغ میں بھی اہم کردار ادا کرتے ہیں۔صاحبہ غفارووا نے مزید کہا کہ غیر وابستہ تحریک کا پارلیمانی نیٹ ورک، جس میں 70 سے زائد ممالک شامل ہیں، پارلیمانی تعاون کے فروغ کے لیے ایک اہم پلیٹ فارم بن چکا ہے۔