مریم نواز کی پولیس کو جرائم پر قابو پانے کیلئے چار ہفتوں کی مہلت

لاہور (تر کیہ خبر) وزیراعلیٰ پنجاب مریم نواز شریف نے صوبے میں امن و امان کی بہتری، خواتین اور بچوں کے خلاف جرائم کے خاتمے اور پولیس کی کارکردگی مؤثر بنانے کے لیے متعلقہ افسران کو چار ہفتوں میں نتائج دینے کی ہدایت کر دی۔سرکاری اعلامیے کے مطابق وزیراعلیٰ کی زیر صدارت امن و امان سے متعلق خصوصی اجلاس ہوا، جس میں علاقائی پولیس افسران اور ضلعی پولیس سربراہان نے ویڈیو رابطے کے ذریعے شرکت کی۔ اجلاس کے دوران صوبے کے تمام ڈویژنوں اور اضلاع میں سکیورٹی کی صورتحال کا تفصیلی جائزہ لیا گیا۔مریم نواز شریف نے خواتین اور بچوں کے خلاف جرائم میں اضافے پر سخت ناراضی کا اظہار کرتے ہوئے ہدایت کی کہ جرائم کی روک تھام اور امن و امان بہتر بنانے کے لیے فوری اور مؤثر اقدامات کیے جائیں۔ انہوں نے خبردار کیا کہ چار ہفتوں کے اندر حالات بہتر نہ ہوئے تو متعلقہ پولیس افسران کو عہدوں سے ہٹایا جا سکتا ہے۔وزیراعلیٰ نے پولیس کو تمام اضلاع، خصوصاً صوبائی سرحدوں سے متصل علاقوں میں گندم کی غیر قانونی ترسیل روکنے کا حکم دیا۔ انہوں نے محکمے میں بدعنوانی کے خلاف کارروائیاں تیز کرنے اور رشوت لینے والے اہلکاروں کے خلاف سخت اقدامات کی بھی ہدایت کی۔انہوں نے ٹریفک کے انتظامات پر عدم اطمینان ظاہر کرتے ہوئے تیز رفتاری کرنے والوں کے خلاف بلاامتیاز کارروائی پر زور دیا۔ اس کے علاوہ صوبے میں غیر قانونی اسلحہ رکھنے والوں کے خلاف پیشگی اقدامات، اسلحے کی برآمدگی اور کیمرے سے لیس عینکوں سمیت دیگر جاسوسی آلات پر عائد پابندی پر مؤثر عمل درآمد یقینی بنانے کی ہدایت کی۔مریم نواز شریف نے پولیس کی گشت بڑھانے اور ہر علاقے میں اہلکاروں کی نمایاں موجودگی یقینی بنانے کا حکم دیا تاکہ جرائم پیشہ افراد کی حوصلہ شکنی ہو۔ انہوں نے لاہور میں ڈولفن فورس کو گشت کے لیے موٹر سائیکلیں اور دیگر ضروری سہولتیں فراہم کرنے کی بھی ہدایت کی۔اجلاس میں راولپنڈی ڈویژن میں امن و امان کی صورتحال پر تشویش کا اظہار کیا گیا۔ وزیراعلیٰ نے تمام علاقائی پولیس افسران کو جرائم کی روک تھام کے لیے ہر ہفتے اجلاس منعقد کرنے اور ضلعی پولیس سربراہان کی کارکردگی سے متعلق رپورٹیں پیش کرنے کی ہدایت کی۔وزیراعلیٰ نے دوٹوک انداز میں کہا کہ پنجاب میں غنڈہ گردی اور بدمعاشی کی اجازت نہیں دی جائے گی اور ایسے عناصر کے ساتھ کوئی رعایت نہیں برتی جائے گی۔ انہوں نے منشیات کے خاتمے، جرائم کی زیادہ شرح والے علاقوں کی نشاندہی اور جرائم پیشہ گروہوں کے نیٹ ورک ختم کرنے کے لیے جامع کارروائیاں کرنے پر بھی زور دیا۔