قدیم گمشدہ پینل واپس، ترکیہ کے مشہور جپسی گرل موزیک کی تکمیل بحال

انقرہ( کلچر ڈیسک)غازی عنتاب، ترکیہ: ترکیہ کے معروف ثقافتی ورثے جپسی گرل موزیک کا صدیوں پرانا گمشدہ پینل واپس ملنے کے بعد اسے زیوگما موزیک میوزیم میں دوبارہ شامل کر دیا گیا ہے۔ترکیہ کے وزیر ثقافت و سیاحت مہمت نوری ایرسوئے نے پینل کی حوالگی کی تقریب سے خطاب کرتے ہوئے کہا کہ جب گمشدہ حصے واپس آتے ہیں تو صرف ایک موزیک مکمل نہیں ہوتا بلکہ متاثرہ تاریخی یادداشت بھی بحال ہوتی ہے۔انہوں نے بتایا کہ دوسری اور تیسری صدی عیسوی سے تعلق رکھنے والا یہ پینل غیر قانونی کھدائیوں کے باعث 1960 کی دہائی میں موزیک سے الگ ہو گیا تھا، جس کے بعد اس کے کئی حصے بیرونِ ملک اسمگل کر دیے گئے۔وزیر ثقافت نے کہا کہ 2018 میں اس موزیک کے 12 پینلز واپس لا کر زیوگما موزیک میوزیم میں دوبارہ جوڑے گئے تھے، جبکہ اب 13واں پینل بھی میوزیم کے ذخیرے کا حصہ بن گیا ہے۔مہمت نوری ایرسوئے کے مطابق ترکیہ نے 2002 سے اب تک 13 ہزار 454 تاریخی اور ثقافتی نوادرات کامیابی سے واپس حاصل کیے ہیں۔ انہوں نے کہا کہ ثقافتی ورثے کا تحفظ اور بیرونِ ملک منتقل کیے گئے آثار کی واپسی ترکیہ کی اہم ترجیحات میں شامل ہے۔