لورین ہل کو لیونگ لیجنڈ آئیکون ایوارڈ، شاندار پرفارمنس سے محفل لوٹ لی

انقرہ( شوبز ڈیسک)معروف امریکی گلوکارہ لورین ہل نے اپنی فنی خدمات کے اعتراف میں دیے گئے "لیونگ لیجنڈ آئیکون ایوارڈ" وصول کرنے کے بعد منعقدہ بی ای ٹی ایوارڈز کی تقریب میں اچانک اپنے 1998 کے مقبول گیت "ایکس فیکٹر" کی پرفارمنس پیش کر کے حاضرین کو حیران کر دیا، جبکہ تقریب کے اختتام پر انہوں نے "ایوری تھنگ اِز ایوری تھنگ" پیش کر کے شائقین سے بھرپور داد وصول کی۔آٹھ مرتبہ گریمی ایوارڈ جیتنے والی لورین ہل کو امریکی اداکار اور ریپر آئس کیوب نے متعارف کرایا۔ لاس اینجلس کے پیاکاک تھیٹر میں ان کے اعزاز میں خصوصی خراجِ تحسین پیش کیا گیا، جس میں ایس زیڈ اے، ڈوچی، لیزو، کوئین لطیفہ، کامن اور ان کے بچوں سیلا مارلے اور زیون مارلے نے ان کے مشہور گانوں کو خراجِ تحسین کے طور پر پیش کیا۔تقریب کے دوران لورین ہل مسکراتے ہوئے، گانوں کے ساتھ گنگناتے اور فنکاروں کی حوصلہ افزائی کرتے دکھائی دیں۔ ایوارڈ وصول کرنے کے بعد انہوں نے فنکاروں پر زور دیا کہ وہ اپنی صلاحیتوں کو پہچانیں اور اپنے مقصد اور فن کے ساتھ سچے رہیں۔