خانکندی کے ماسٹر پلان کی تیاری آخری مراحل میں، شہر کو “یوتھ سٹی” کے طور پر ترقی دینے کا منصوبہ

خانکندی ( ترکیہ خبر) شہر کا ماسٹر پلان جلد مکمل کر لیا جائے گا اور اس حوالے سے جلد عوام کو تفصیلی آگاہی فراہم کی جائے گی۔یہ بات الچن یوسوبوف نے خانکندی میں منعقدہ نیشنل بزنس ڈیولپمنٹ فورم سے خطاب کرتے ہوئے کہی۔ انہوں نے بتایا کہ اس وقت شہر کے ترقیاتی تصور پر مغربی کمپنیوں کے ساتھ کام جاری ہے۔انہوں نے کہا کہ منصوبے کے تحت خانکندی کو ایک “یوتھ سٹی” کے طور پر ترقی دینے کا ہدف رکھا گیا ہے، جہاں تعلیم اور سماجی انفراسٹرکچر کو خاص ترجیح دی جا رہی ہے۔ان کے مطابق قراباغ یونیورسٹی کے لیے وسیع رقبہ مختص کیا گیا ہے جہاں طلبہ اور تدریسی عملے کے لیے جدید اور آرام دہ سہولیات فراہم کی جائیں گی۔ اندازہ ہے کہ مستقبل میں طلبہ اور اساتذہ شہر کی مجموعی آبادی کا تقریباً 12 سے 15 فیصد حصہ ہوں گے۔انہوں نے مزید بتایا کہ منصوبے کے مطابق خانکندی کو مستقبل میں تقریباً 80 ہزار آبادی والا جدید اور پائیدار شہر بنانے کا ہدف رکھا گیا ہے، جہاں تمام ترقیاتی منصوبے تیزی سے جاری ہیں تاکہ شہر کو جلد ایک مکمل جدید شہری مرکز کے طور پر ترقی دی جا سکے۔