اسرائیل نے ایران میں فضائی حملے تیز کر دیے، مشہد اور کاشان نشانے پر

ایران( مانیٹرنگ ڈیسک) ایرانی میڈیا نے اطلاع دی ہے کہ ملک کے شمال مشرق میں مشہد ایئرپورٹ کے قریب اور وسط میں واقع شہر کاشان کو فضائی حملوں کا نشانہ بنایا گیا ہے۔ باخبر ذرائع کے مطابق اسرائیلی فوج نے ایران میں اہم اہداف پر اپنے حملے تیز کر دیے ہیں، کیونکہ امریکہ اور تہران کے درمیان مذاکرات کے امکانات بڑھ رہے ہیں اور تل ابیب میں فوجی کارروائیاں جلد رک جانے کا خدشہ پایا جاتا ہے۔امریکی اخبار نیویارک ٹائمز کے مطابق اعلیٰ سطح کے اسرائیلی حکام نے بتایا کہ وزیراعظم بنیامین نیتن یاہو نے گزشتہ منگل کو ہدایت دی تھی کہ 48 گھنٹوں کے اندر ایران کی دفاعی صنعت کو زیادہ سے زیادہ نقصان پہنچانے کے لیے بھرپور کارروائی کی جائے۔ذرائع کا کہنا ہے کہ یہ فیصلہ اسرائیلی حکومت کی جانب سے امریکی 15 نکاتی منصوبے کے مسودے پر بریفنگ کے بعد کیا گیا، جسے خیال کیا جاتا ہے کہ ایران کو بھیج دیا گیا ہے۔ کچھ حکام نے ان ملاقاتوں میں شرکت کی جہاں منصوبے کی تفصیلات پر تبادلہ خیال ہوا۔ماہرین کے مطابق اس کارروائی سے خطے میں کشیدگی میں اضافہ ہو سکتا ہے اور مستقبل قریب میں مذاکرات پر اثر پڑنے کا امکان موجود ہے۔