آئرلینڈ نے یورپی یونین کی چھ ماہ کی گردشی صدارت سنبھال لی

ڈبلن( مانیٹرنگ ڈیسک) آئرلینڈ نے یورپی یونین کی کونسل کی چھ ماہ کے لیے گردشی صدارت سنبھال لی ہے، جس دوران اسے خطے میں بڑھتے ہوئے عالمی جغرافیائی و سیاسی چیلنجز کے درمیان تقریباً 300 قانون سازی سے متعلق معاملات پر پیش رفت کرنی ہوگی۔عالمی میڈیا رپورٹس کے مطابق ان امور میں یورپی یونین کے طویل المدتی بجٹ پر مذاکرات، یورپی دفاع، یوکرین کی حمایت، ہمسایہ ممالک کے ساتھ تعلقات اور مرکوسور تجارتی معاہدہ شامل ہیں۔آئرلینڈ نے اعلان کیا ہے کہ اس کی صدارت کے دوران یورپی یونین کی مسابقتی صلاحیت کو مضبوط بنانے پر خصوصی توجہ دی جائے گی۔ اس مقصد کے لیے قواعد و ضوابط کو آسان بنانے، رہائشی، توانائی اور بنیادی ڈھانچے کے منصوبوں کو تیز کرنے کی پالیسی اپنائی جائے گی۔رپورٹ کے مطابق آئرش قیادت کا کہنا ہے کہ مشترکہ یورپی منڈی کو مزید مستحکم کیا جائے گا اور قابلِ اعتماد شراکت داروں کے ساتھ تجارتی روابط کو وسعت دیتے ہوئے سپلائی چین کو بھی مضبوط بنایا جائے گا۔آئرلینڈ کی صدارت میں توانائی کے تحفظ، صاف توانائی کی منتقلی، ڈیجیٹل ٹیکنالوجی، مصنوعی ذہانت، کلاؤڈ کمپیوٹنگ اور زیرِ سمندر مواصلاتی کیبلز کے تحفظ کو بھی ترجیحات میں شامل کیا گیا ہے۔اس کے علاوہ پائیدار زراعت، ماہی گیری، جدت طرازی، ایراسمس پلس طلبہ تبادلہ پروگرام، سیمی کنڈکٹرز اور بایو ٹیکنالوجی جیسے شعبوں میں سرمایہ کاری پر بھی زور دیا جائے گا۔مزید کہا گیا ہے کہ صحت اور طبی ٹیکنالوجی سے متعلق قوانین کو جدید بنانے پر بھی کام کیا جائے گا تاکہ یورپی یونین کی اقتصادی اور تزویراتی صلاحیت کو مزید مضبوط کیا جا سکے۔