ایران نے امریکی طیارہ بردار جہاز یو ایس ایس ابراہام لنکن پر میزائل فائر کر دیے

تہران( مانیٹر نگ ڈیسک) ایرانی فوج نے اعلان کیا ہے کہ اس نے ایران کے ساحلوں سے امریکی طیارہ بردار بحری جہاز یو ایس ایس ابراہام لنکن پر متعدد کروز میزائل داغے ہیں، جن میں سے کچھ جہاز کو بھی لگے ہیں۔ایرانی بحریہ کے کمانڈر شہرام ایرانی نے بتایا کہ طیارہ بردار جہاز پر میزائل داغے گئے اور مزید حملوں کے امکان سے بھی خبردار کیا۔ فوجی بیان میں کہا گیا کہ ایرانی میزائلوں نے خلیج میں تعینات اس طیارہ بردار جہاز کو اپنی پوزیشن بدلنے پر مجبور کر دیا۔شہرام ایرانی نے وضاحت کی کہ اس جہاز کی نقل و حرکت مسلسل نگرانی میں ہے اور جیسے ہی یہ دشمن بیڑہ ایرانی میزائل سسٹم کی رینج میں داخل ہوگا، یہ زوردار حملوں کا نشانہ بنایا جائے گا۔ 13 مارچ کو ایرانی مسلح افواج کے مرکزی ہیڈ کوارٹر نے اعلان کیا تھا کہ طیارہ بردار جہاز اور امریکی پانچویں بیڑے کے دیگر طیاروں پر میزائل اور ڈرونز سے بمباری کی گئی ہے۔یہ پیش رفت اس وقت سامنے آئی ہے جب امریکی طیارہ بردار جہاز یو ایس ایس جیرالد آر فورڈ ایران پر حملے میں حصہ لینے کے بعد یونانی جزیرے کریٹ کے بحری اڈے پر واپس پہنچا۔ فرانسیسی پریس ایجنسی کے فوٹوگرافر کے مطابق "جیرالد آر فورڈ" نے یو ایس ایس ابراہام لنکن کے ساتھ مل کر 28 فروری کو ایران کے خلاف حملے میں حصہ لیا تھا۔