آئی او سی نے روسی اولمپک کمیٹی کی معطلی عارضی طور پر ختم کر دی

باکو( سپورٹس ڈیسک) بین الاقوامی اولمپک کمیٹی (آئی او سی) نے اکتوبر 2023 سے نافذ روسی اولمپک کمیٹی کی معطلی عارضی طور پر ختم کرنے کا اعلان کر دیا ہے۔آئی او سی کی صدر کرسٹی کووینٹری نے کہا کہ کھلاڑیوں کو ان کی حکومتوں کے اقدامات کا ذمہ دار نہیں ٹھہرایا جانا چاہیے، اسی لیے یہ فیصلہ کیا گیا ہے۔انہوں نے واضح کیا کہ روس میں بین الاقوامی کھیلوں کے مقابلوں کے انعقاد پر پابندی برقرار رہے گی، جبکہ روسی پرچم، قومی ترانے اور دیگر قومی علامات سے متعلق پالیسی کا مستقبل میں دوبارہ جائزہ لیا جائے گا۔آئی او سی کے ایگزیکٹو بورڈ نے 28 فروری 2022 کو بین الاقوامی کھیلوں کی فیڈریشنز کو سفارش کی تھی کہ وہ روس اور بیلاروس کے کھلاڑیوں اور عہدیداروں کو عالمی مقابلوں میں شرکت سے روک دیں۔بعد ازاں 28 مارچ 2023 کو آئی او سی نے فیصلہ کیا کہ روسی اور بیلاروسی پاسپورٹ رکھنے والے کھلاڑی انفرادی غیر جانبدار کھلاڑی کی حیثیت سے بین الاقوامی مقابلوں، بشمول پیرس 2024 اولمپکس اور میلان-کورٹینا 2026 سرمائی اولمپکس، میں حصہ لے سکتے ہیں، تاہم انہیں قومی پرچم، ترانے یا دیگر قومی علامات استعمال کرنے کی اجازت نہیں ہوگی۔اس کے علاوہ 7 مئی 2026 کو آئی او سی کے ایگزیکٹو بورڈ نے اعلان کیا تھا کہ وہ بیلاروسی کھلاڑیوں کی شرکت پر مزید کسی پابندی کی سفارش نہیں کرتا۔