صدر الہام علی یوف سے فلسطینی وزیراعظم کی ملاقات، دوطرفہ تعلقات مزید مضبوط بنانے پر اتفاق

باکو( ترکیہ خبر) آذربائیجان کے صدر الہام علی یوف نے 16 جولائی کو فلسطین کے وزیراعظم محمد مصطفیٰ سے ملاقات کی۔ملاقات کے دوران آذربائیجانی صدر نے امید ظاہر کی کہ فلسطینی وزیراعظم کا دورۂ آذربائیجان دونوں برادر ممالک کے درمیان تعلقات کو مزید مضبوط بنانے میں معاون ثابت ہوگا۔صدر الہام علی یوف نے ایک آزاد اور خودمختار فلسطینی ریاست کے قیام کے لیے آذربائیجان کی حمایت کا اعادہ کیا، جس کا دارالحکومت مشرقی یروشلم ہو۔فلسطینی وزیراعظم محمد مصطفیٰ نے آذربائیجان کے صدر سے ملاقات پر خوشی کا اظہار کرتے ہوئے فلسطین کے صدر محمود عباس کا تہنیتی پیغام صدر الہام علی یوف تک پہنچایا۔آذربائیجانی صدر نے محمود عباس کے خیرسگالی پیغام پر شکریہ ادا کیا اور فلسطینی وزیراعظم سے درخواست کی کہ وہ ان کی جانب سے بھی فلسطینی صدر کو نیک خواہشات پہنچائیں۔صدر الہام علی یوف نے محمود عباس کے آذربائیجان کے دوروں اور مختلف عالمی تقریبات کے موقع پر ہونے والی ملاقاتوں کو خوشگوار یادوں کے طور پر بیان کیا۔ملاقات میں آذربائیجان اور فلسطین کے درمیان دوستانہ تعلقات، باہمی تعاون اور دوطرفہ روابط کے فروغ پر بھی تبادلہ خیال کیا گیا۔