سوئس وزیر خارجہ: آذربائیجان کے ساتھ تعلقات مزید مضبوط بنانے کے خواہاں ہیں

باکو( تر کیہ خبر) سوئٹزرلینڈ کے وفاقی وزیر خارجہ اور یورپ میں سلامتی و تعاون کی تنظیم (او ایس سی ای) کے چیئرمین اِن آفس ایگنازیو کاسِس نے آذربائیجان کے سرکاری خبر رساں ادارے کو خصوصی انٹرویو دیتے ہوئے کہا ہے کہ ان کا ملک آذربائیجان کے ساتھ سیاسی مکالمے اور اقتصادی تعاون کو مزید فروغ دینا چاہتا ہے۔ایگنازیو کاسِس نے کہا کہ سوئٹزرلینڈ ان اولین ممالک میں شامل تھا جنہوں نے آذربائیجان کی آزادی بحال ہونے کے بعد اسے تسلیم کیا، جس سے دونوں ممالک کے درمیان مضبوط اور دیرپا تعلقات کی بنیاد قائم ہوئی۔انہوں نے کہا کہ باکو کا دورہ دونوں ممالک کے درمیان سیاسی روابط کو مزید گہرا کرنے، اقتصادی تعاون کو مضبوط بنانے اور باہمی دلچسپی کے علاقائی و عالمی امور پر تبادلہ خیال کا اہم موقع ہے۔سوئس وزیر خارجہ نے کہا کہ دونوں ممالک کے درمیان سفارتی تعلقات کے قیام کی 35ویں سالگرہ کے موقع پر سوئٹزرلینڈ گزشتہ کامیابیوں کو مزید آگے بڑھاتے ہوئے باہمی شراکت داری کو مضبوط بنانے کا خواہاں ہے۔