ترکیہ میں عالمی ماحولیاتی کانفرنس کا آغاز، آذربائیجان وفد کی شرکت

باکو (تر کیہ خبر) ترکیہ کے شہر انطالیہ میں 9 نومبر کو اقوام متحدہ کے موسمیاتی تبدیلی سے متعلق عالمی معاہدے کے فریق ممالک کی 31ویں کانفرنس (کوپ 31) کا باقاعدہ آغاز ہوگیا، جس میں آذربائیجان کا اعلیٰ سطحی وفد بھی شریک ہے۔آذربائیجان کی خبر رساں ایجنسی کے مطابق آذربائیجانی وفد نے کانفرنس کی افتتاحی تقریب کے علاوہ عالمی سطح پر ماحولیاتی تعاون کو فروغ دینے کے حوالے سے منعقدہ اہم اجلاسوں میں بھی شرکت کی۔افتتاحی تقریب کے دوران ترکیہ کے وزیر ماحولیات، شہری منصوبہ بندی اور موسمیاتی تبدیلی مرات کوروم نے کوپ 30 کے صدر آندرے کوریا ڈو لاگو سے کانفرنس کی صدارت کی ذمہ داریاں باضابطہ طور پر سنبھال لیں۔تقریب میں عالمی ماحولیاتی تعاون مضبوط بنانے، پیرس معاہدے کے اہداف حاصل کرنے اور موسمیاتی تبدیلی سے متعلق طے شدہ وعدوں کو عملی اقدامات میں تبدیل کرنے کی ضرورت پر زور دیا گیا۔مرات کوروم نے اپنے افتتاحی خطاب میں عالمی ماحولیاتی سرگرمیوں میں مؤثر کردار ادا کرنے پر آذربائیجان کے وفد کا شکریہ ادا کیا۔انہوں نے یاد دلایا کہ کوپ 29 کے موقع پر باکو میں موسمیاتی منصوبوں کے لیے سالانہ 300 ارب امریکی ڈالر کی نئی مالی معاونت کا ہدف مقرر کیا گیا تھا۔ ان کا کہنا تھا کہ مالی اعانت سے متعلق کیے گئے وعدوں کو ٹھوس عملی نتائج میں تبدیل کرنا انتہائی اہمیت رکھتا ہے۔