باکو میں ترک دنیا کی ثقافتی ورثے پر نمائش، “دیوان لغات الترک” کی تاریخی اہمیت اجاگر کی گئی

باکو( شوبز ڈیسک) آذربائیجان کے دارالحکومت باکو میں ترک دنیا کے ہفتۂ ثقافت کے سلسلے میں ایک خصوصی نمائش کا افتتاح کیا گیا۔یہ نمائش پہلے ترکولوجی کانگریس کی صد سالہ تقریبات کے موقع پر “ثقافتی خزانہ: دیوان لغات الترک” کے عنوان سے نیشنل کارپٹ میوزیم میں منعقد کی گئی۔تقریب میں علینا علییوا نے بھی شرکت کی۔آذربائیجان نیشنل کارپٹ میوزیم کی ڈائریکٹر آمنہ ملیکووا نے کہا کہ یہ نمائش آذربائیجان کی وزارتِ ثقافت، ترکیہ کی وزارتِ ثقافت و سیاحت، وزارتِ قومی تعلیم، یونُس امرے انسٹیٹیوٹ اور “اولغونلاشمہ” اداروں کے تعاون سے منعقد کی گئی ہے۔انہوں نے کہا کہ یہ نمائش زبان، تاریخ، فن اور تعلیم کو یکجا کرتی ہے اور ایک ہزار سال سے زائد پرانے ثقافتی ورثے کو نئی نسل تک منتقل کرنے میں مدد فراہم کرتی ہے۔ان کے مطابق نمائش میں “دیوان لغات الترک” میں موجود روحانی اور ثقافتی اقدار کو جدید زاویے سے پیش کیا گیا ہے، اور یہ دکھایا گیا ہے کہ کس طرح صدیوں کے دوران لفظ، قدر، عمل اور ثقافتی تسلسل میں تبدیل ہوتا رہا۔تقریب سے خطاب کرتے ہوئے وزیر ثقافت کے مشیر جہانگیر سلیمخانوف نے کہا کہ یہ نمائش ترک زبان کی تاریخی ارتقا اور اس کی ثقافتی وسعت کو اجاگر کرنے والا ایک اہم قدم ہے۔انہوں نے کہا کہ زبان ایک زندہ نظام ہے جو مسلسل ارتقا پذیر رہتا ہے، اور آذربائیجانی زبان بھی ترک زبانوں کے ساتھ تعامل کے ذریعے مزید ترقی کر رہی ہے۔ ان کے مطابق “دیوان لغات الترک” ترک زبانوں کے لسانی اور ثقافتی ورثے کا ایک انتہائی اہم ماخذ ہے۔