یورپی کمیشن کی صدر کا دورۂ آذربائیجان، تعلقات کے نئے مرحلے کی علامت

باکو( ترکیہ خبر) بین الاقوامی یوریشین پریس فاؤنڈیشن کے صدر امید مرزایف نے کہا ہے کہ یورپی کمیشن کی صدر ارسولا فان ڈیر لاین کا آذربائیجان کا دورہ آذربائیجان اور یورپی یونین کے درمیان گزشتہ برسوں میں قائم ہونے والے اسٹریٹجک تعاون کے ایک نئے اور اہم مرحلے کی عکاسی کرتا ہے۔آذربائیجان کی سرکاری خبر رساں ایجنسی کے مطابق امید مرزایف نے کہا کہ پائیدار استحکام صرف سیاسی معاہدوں سے ممکن نہیں ہوتا، بلکہ حقیقی اور دیرپا امن اس وقت قائم ہوتا ہے جب عوام کو تحفظ حاصل ہو، بے گھر افراد اپنے آبائی علاقوں میں واپس لوٹ سکیں، معاشی مواقع پیدا ہوں اور مستقبل پر اعتماد بحال ہو۔انہوں نے کہا کہ آذربائیجان نے حالیہ برسوں میں متعدد اہم منصوبے مکمل کیے ہیں، جن میں توانائی کے تحفظ میں کردار، وسطی راہداری کی ترقی، سبز توانائی کے شعبے میں بین الاقوامی شراکت داری، آزاد کرائے گئے علاقوں کی بحالی اور وہاں نئی رہائشی بستیوں کا قیام شامل ہے۔امید مرزایف کے مطابق یہ اقدامات خطے میں طویل المدتی استحکام، علاقائی تعاون اور باہمی اعتماد کے فروغ میں اہم کردار ادا کر رہے ہیں