آذربائیجان میں فعال ٹیکس دہندگان کی تعداد 8 لاکھ 80 ہزار سے زائد ہو گئی

باکو( تر کیہ خبر) آذربائیجان میں اس وقت 8 لاکھ 80 ہزار سے زائد فعال ٹیکس دہندگان، 61 ہزار سے زیادہ فعال وی اے ٹی ادا کنندگان اور 2 لاکھ 42 ہزار سے زائد فعال کاروباری ادارے کام کر رہے ہیں۔آذربائیجان کی وزارت معیشت کے ماتحت اسٹیٹ ٹیکس سروس کے سربراہ اورخان نذرلی نے آذربائیجان اسٹیٹ نیوز ایجنسی (اے زیڈ ای آر ٹی اے سی) اور ریئل ٹی وی کو انٹرویو میں بتایا کہ یہ اعداد و شمار ملک میں معاشی توسیع کا نتیجہ ہیں۔انہوں نے کہا کہ گزشتہ سات برسوں کے اعداد و شمار کا جائزہ لیا جائے تو مجموعی ٹیکس آمدن میں تیل اور گیس کے شعبے کے علاوہ دیگر شعبوں کا حصہ 67 فیصد سے بڑھ کر 80 فیصد تک پہنچ گیا ہے، جو نمایاں اضافہ ہے۔اورخان نذرلی کے مطابق حکومت صرف بجٹ میں ٹیکس آمدن کے حجم کو نہیں دیکھ رہی بلکہ مجموعی قومی پیداوار (جی ڈی پی) میں ٹیکس آمدن کے تناسب کو بھی مدنظر رکھا جا رہا ہے۔انہوں نے بتایا کہ اس عرصے کے دوران جی ڈی پی میں ٹیکس آمدن کا حصہ 9.4 فیصد سے بڑھ کر 12.7 فیصد ہو گیا ہے۔ ان کا کہنا تھا کہ یہ اعداد و شمار صرف ٹیکس آمدن سے متعلق ہیں۔