آذربائیجان اور ازبکستان میں دائمی دوستی معاہدہ تاریخی اہمیت کا حامل قرار

باکو( تر کیہ خبر) ازبکستان کے اسلامی تہذیب مرکز کے ڈائریکٹر کے مشیر اور ممتاز فنکار ترسونالی کوزییف نے کہا ہے کہ آذربائیجان اور ازبکستان کے تعلقات روایتی سفارتی روابط سے کہیں آگے بڑھ چکے ہیں۔انہوں نے آذربائیجان کی سرکاری خبر رساں ایجنسی سے گفتگو کرتے ہوئے کہا کہ آذربائیجان ان اولین ممالک میں شامل تھا جنہوں نے آزاد ازبکستان کو تسلیم کرکے تاشقند میں اپنا سفارتخانہ قائم کیا۔ 2024 میں دونوں ممالک نے اتحادی تعلقات کے معاہدے پر دستخط کیے، جبکہ گزشتہ روز صدر شوکت مرزیویوف اور صدر الہام علییف نے دائمی دوستی کے معاہدے پر دستخط کیے۔ترسونالی کوزییف کے مطابق نئے معاہدے سے موجودہ اتحاد ختم نہیں ہوگا بلکہ دونوں ممالک کی شراکت داری کو تاریخی اور علامتی طور پر مزید مضبوط بنائے گا۔ اس معاہدے کے عملی ثمرات نئے کاروباری منصوبوں، سفری رابطوں، جامعات کے پروگراموں، ثقافتی سرگرمیوں اور نوجوانوں کے لیے مواقع کی صورت میں سامنے آنے چاہئیں۔انہوں نے کہا کہ دونوں ممالک بینکاری، تعمیرات، تعلیم، سیاحت، کان کنی اور زراعت سمیت مختلف شعبوں میں مشترکہ منصوبے شروع کرچکے ہیں، جبکہ باہمی سرمایہ کاری، ٹیکنالوجی، تجارت، سائنس اور ثقافت میں تعاون سے وسطی ایشیا اور قفقاز کے روابط مزید مستحکم ہوں گے۔