آذربائیجان، برطانیہ میں نئے اسٹریٹجک تعاون پر اتفاق

باکو( تر کیہ خبر)آذربائیجان کے صدر الہام علییف نے 18 اگست کو آذربائیجان میں برطانیہ کے نئے تعینات ہونے والے سفیر ڈنکن نارمن سے ملاقات کی، جنہوں نے صدر کو اپنی سفارتی اسناد پیش کیں۔سفیر ڈنکن نارمن نے آذربائیجانی زبان میں گفتگو کا آغاز کرتے ہوئے کہا کہ وہ 27 برس قبل اپنی اہلیہ کیری کے ہمراہ پہلی بار آذربائیجان آئے تھے اور یہاں کے عوام کی گرمجوشی اور باکو کی بے پناہ صلاحیتوں سے متاثر ہوئے تھے۔ ان کے مطابق اس عرصے میں آذربائیجان نے غیر معمولی ترقی کی ہے اور وہ دونوں ممالک کے تعلقات میں ایک نئے باب کے آغاز پر فخر محسوس کرتے ہیں۔برطانوی سفیر نے بتایا کہ برطانیہ اور آذربائیجان کے درمیان نئی اسٹریٹجک شراکت داری پر کام جاری ہے، جو گہرے تعاون، سلامتی کے استحکام اور مشترکہ ترجیحات میں جدت کو فروغ دے کر دونوں ممالک کی کامیابیوں کو مزید آگے بڑھائے گی۔انہوں نے قابلِ تجدید توانائی، دفاع اور ہوا بازی کے شعبوں میں آذربائیجان کے ساتھ فعال شراکت داری قائم کرنے کی برطانوی خواہش کا اظہار کیا، جبکہ تعلیمی روابط اور نوجوانوں کے درمیان تعلقات مضبوط بنانے کی اہمیت بھی اجاگر کی۔ڈنکن نارمن نے کہا کہ برطانوی حکومت آذربائیجان اور آرمینیا کے درمیان امن کے قیام کے لیے صدر الہام علییف کی کوششوں کو قدر کی نگاہ سے دیکھتی اور اس پیش رفت کی حمایت کرتی ہے۔انہوں نے یہ بھی یاد دلایا کہ برطانیہ آذربائیجان کی بارودی سرنگوں کی صفائی کی کوششوں کی حمایت کرنے والا پہلا بین الاقوامی شراکت دار تھا۔