آذربائیجان کے مذہبی رہنما کی امن کانفرنس میں شرکت

باکو( تر کیہ خبر) قفقاز مسلم بورڈ کے سربراہ شیخ الاسلام اللہ شکور پاشازادہ نے اقوام متحدہ کے تہذیبوں کے اتحاد کے اعلیٰ نمائندے میگوئل اینجل موراتینوس کی دعوت پر انگولا کا دورہ کیا، جہاں انہوں نے لوانڈا میں منعقدہ امن اتحاد سربراہی اجلاس میں شرکت کی۔یہ اجلاس 16 اور 17 جولائی کو ’’امن کا مطالبہ، جنگوں کا خاتمہ اور عالمی قوانین کا احترام‘‘ کے عنوان سے شروع کیے گئے اقدام کے تحت منعقد ہوا۔اجلاس کی افتتاحی تقریب سے اقوام متحدہ کے تہذیبوں کے اتحاد کے اعلیٰ نمائندے میگوئل اینجل موراتینوس، انگولا کے صدر ژاؤ مینوئل گونزالویز لورینسو اور جمہوریہ کانگو کے صدر فیلکس اینطوان تشی سیکیدی نے خطاب کیا۔ مقررین نے اس بات کو نمایاں کیا کہ شیخ الاسلام اللہ شکور پاشازادہ اجلاس میں شریک واحد مذہبی رہنما تھے۔دورے کے دوران شیخ الاسلام اللہ شکور پاشازادہ نے میگوئل اینجل موراتینوس، انگولا اور جمہوریہ کانگو کے صدور، نمیبیا کے وزیراعظم، انگولا کے وزیر خارجہ، اسپین کے شہر گرنیکا کے میئر اور دیگر اعلیٰ حکام سے ملاقاتیں کیں۔17 جولائی کو موضوعاتی نشست کی افتتاحی تقریب سے خطاب کرتے ہوئے قفقاز مسلم بورڈ کے سربراہ نے اقوام متحدہ کے تہذیبوں کے اتحاد کی جانب سے امن، باہمی احترام اور عالمی قوانین کے فروغ کے لیے کی جانے والی کوششوں کو سراہا۔ انہوں نے تہذیبوں کے درمیان مکالمے کو مضبوط بنانے میں میگوئل اینجل موراتینوس کے کردار کی بھی تعریف کی۔شیخ الاسلام نے امن، کثیرالثقافتی ہم آہنگی اور مختلف مذاہب کے درمیان مکالمے کے فروغ میں آذربائیجان کے تجربات پر روشنی ڈالی اور اقوام متحدہ کے تہذیبوں کے اتحاد کے ساتھ ملک کے قریبی تعاون کا ذکر کیا۔ انہوں نے کہا کہ صدر الہام علییف کی جانب سے آذربائیجان اور آرمینیا کے درمیان امن عمل کو آگے بڑھانے کی کوششوں کو عالمی سطح پر پذیرائی حاصل ہوئی ہے۔انہوں نے کہا کہ تمام مقدس کتابیں ایک بے گناہ انسان کے قتل کو پوری انسانیت کے خلاف جرم قرار دیتی ہیں۔ شیخ الاسلام نے گرنیکا، سربرینیکا اور خوجالی کے سانحات کی یاد کو محفوظ رکھنے کی اہمیت پر زور دیتے ہوئے کہا کہ جاری تنازعات کا حل عالمی قوانین کی بنیاد پر پرامن طریقے سے نکالا جانا چاہیے اور مستقبل کے سانحات کی روک تھام کے لیے عالمی تعاون کو مزید مضبوط بنانے کی ضرورت ہے۔