آذربائیجان اور افریقی پارلیمنٹ کے درمیان تعاون بڑھانے پر اتفاق

باکو( تر کیہ خبر)جنوبی افریقہ کے دورے کے دوران آذربائیجان کی ملی مجلس کی اسپیکر صاحبہ غفارووا نے پین افریقی پارلیمنٹ (پی اے پی) کے صدر فاتح بوتبیگ سے ملاقات کی۔ملاقات میں آذربائیجان اور افریقی ممالک کے درمیان دوستانہ تعلقات، بین الپارلیمانی تعاون کے فروغ کے امکانات اور باہمی دلچسپی کے دیگر امور پر تفصیلی تبادلہ خیال کیا گیا۔اس موقع پر افریقی یونین کے ایجنڈا 2063 پر عملدرآمد میں پارلیمانوں کے اہم کردار کو اجاگر کیا گیا۔پین افریقی پارلیمنٹ کے صدر فاتح بوتبیگ نے کہا کہ آذربائیجان افریقی ممالک کا ایک قابل اعتماد شراکت دار ہے۔ انہوں نے کہا کہ دونوں فریق مشترکہ اقدار، باہمی احترام اور مضبوط تعلقات کے جذبے سے منسلک ہیں۔انہوں نے مزید کہا کہ پارلیمانی سفارت کاری عوام کے درمیان روابط مضبوط بنانے اور مشترکہ مفادات کے فروغ میں اہم کردار ادا کرتی ہے۔صاحبہ غفارووا نے کہا کہ آذربائیجان افریقی ممالک کے ساتھ تعلقات کے فروغ کو خصوصی اہمیت دیتا ہے۔ انہوں نے بین الپارلیمانی روابط میں وسعت، سیاسی مکالمے کے فروغ، باہمی اعتماد میں اضافے اور نئے شعبوں میں تعاون کی ضرورت پر زور دیا۔آذربائیجانی اسپیکر نے کہا کہ بین الپارلیمانی تعلقات میں مزید توسیع دونوں فریقوں کے مفاد میں ہوگی۔ انہوں نے غیر وابستہ تحریک کے پارلیمانی نیٹ ورک کے ساتھ ادارہ جاتی تعاون بڑھانے کے لیے موجود مواقع کا بھی ذکر کیا۔ملاقات کے دوران آذربائیجان کی ملی مجلس اور پین افریقی پارلیمنٹ کے درمیان تعاون کے فروغ، غیر وابستہ تحریک کے پارلیمانی نیٹ ورک اور پین افریقی پارلیمنٹ کے باہمی روابط، عالمی پارلیمانی تنظیموں کے دائرہ کار میں تعاون اور دیگر مشترکہ دلچسپی کے امور پر بھی خیالات کا تبادلہ کیا گیا۔