آذربائیجان، ملائیشیا کا اقتصادی و تجارتی تعاون بڑھانے پر اتفاق

باکو( تر کیہ خبر) آذربائیجان کے وزیر خارجہ جیحون بایراموف نے آذربائیجان کیلئے ملائیشیا کی نامزد سفیر ازنیفہ اسناریہ بنتی عبدال غنی سے ملاقات کی۔ملائیشیا کی نامزد سفیر نے آذربائیجان کے وزیر خارجہ کو اپنی اسناد کی نقل پیش کی۔ جیحون بایراموف نے انہیں نئی ذمہ داری سنبھالنے پر مبارکباد دیتے ہوئے سفارتی مشن کیلئے نیک خواہشات کا اظہار کیا۔ملاقات میں آذربائیجان اور ملائیشیا کے دوطرفہ تعلقات کی موجودہ صورتحال اور مستقبل کے امکانات کا جائزہ لیا گیا۔ دونوں جانب سے معیشت، تجارت، سیاحت، تعلیم اور باہمی دلچسپی کے دیگر شعبوں میں تعاون مزید وسیع کرنے پر تبادلہ خیال کیا گیا۔فریقین نے آذربائیجان کی نقل و حمل اور رسد کی صلاحیتوں، علاقائی رابطوں اور توانائی کے تحفظ میں اس کے کردار پر بھی بات چیت کی۔جیحون بایراموف نے اقوام متحدہ، اسلامی تعاون تنظیم، غیر وابستہ تحریک اور ڈی ایٹ تنظیم سمیت عالمی اداروں میں باہمی حمایت کو اہم قرار دیا۔ دونوں جانب نے کہا کہ دوستانہ تعلقات کثیرالجہتی پلیٹ فارمز پر ایک دوسرے کی حمایت اور یکجہتی سے بھی ظاہر ہوتے ہیں۔ملاقات میں رواں سال باکو میں ہونے والی ایشیا میں باہمی روابط اور اعتماد سازی کے اقدامات سے متعلق کانفرنس کے آئندہ سربراہی اجلاس کی تیاریوں پر بھی گفتگو ہوئی۔ جیحون بایراموف نے بتایا کہ آذربائیجان 2027ء میں اسلامی تعاون تنظیم کی سربراہی کانفرنس کی میزبانی بھی کرے گا۔