آذربائیجان میں امن ماہ کے تحت مختلف آگاہی سرگرمیاں

باکو( تر کیہ خبر)آذربائیجان کے انسانی حقوق کے محتسب صابینہ علی یوا کی جانب سے 21 ستمبر، عالمی یومِ امن کے موقع پر اعلان کردہ ’’امن ماہ‘‘ اختتام پذیر ہوگیا۔21 اگست سے 21 ستمبر تک جاری رہنے والے امن ماہ کے دوران محتسب کے دفتر، علاقائی مراکز، مختلف سرکاری اداروں، مقامی حکومتوں، سول سوسائٹی اور دیگر تنظیموں نے امن اور انسانی حقوق کے موضوع پر متعدد تقریبات اور آگاہی مہمات منعقد کیں۔عالمی یومِ امن کے موقع پر آذربائیجان کی سرکاری خبر رساں ایجنسی کو دیے گئے انٹرویو میں انسانی حقوق کی محتسب صابینہ علی یوا نے امن ماہ کے نتائج، خطے میں امن و استحکام کے فروغ کے امکانات، ماہ کے دوران کیے گئے اقدامات اور معاشرے میں امن کے فروغ کے لیے کی جانے والی کوششوں پر گفتگو کی۔