آذربائیجان میں شہری منصوبہ بندی میں عوامی شمولیت پر زور

 باکو( تر کیہ خبر) آذربائیجان کی ریاستی کمیٹی برائے شہری منصوبہ بندی و فن تعمیر کے چیئرمین انار گلی یوف نے کہا ہے کہ ملک میں قوانین کے تحت ماسٹر پلانز کی منظوری سے قبل مقامی سطح پر عوامی مشاورت کی جاتی ہے تاکہ منصوبہ بندی کے عمل میں شہریوں کی شرکت یقینی بنائی جا سکے۔انہوں نے یہ بات امریکا کے شہر نیویارک میں اقوام متحدہ کی جنرل اسمبلی کے تحت نئے شہری ایجنڈے پر عملدرآمد کے وسط مدتی جائزہ اجلاس کے دوران منعقدہ پہلے کثیر فریقی اجلاس سے خطاب کرتے ہوئے کہی۔انار گلی یوف نے کہا کہ شہری ترقی کے منصوبوں کے لیے سول سوسائٹی کی جانب سے شروع کیے گئے اقدامات کو مالی معاونت فراہم کی جاتی ہے، جس سے عوامی شمولیت کو عملی اقدامات میں تبدیل کرنے اور جامع شہروں کے لیے شراکت داری کو مضبوط بنانے میں مدد ملتی ہے۔انہوں نے کہا کہ پائیدار ترقی کے ہدف 11 کے جائزے، عالمی شہری فورم اور نئے شہری ایجنڈے کے وسط مدتی جائزے سے ایک واضح پیغام سامنے آتا ہے کہ رہائش کے منصوبوں کو مربوط ہونا چاہیے، ترقیاتی عمل میں سب کی شمولیت ضروری ہے اور بحالی کے اقدامات کو ابتدا ہی سے طویل مدتی منصوبہ بندی کے تحت آگے بڑھایا جانا چاہیے۔