آذربائیجان اور گھانا کے تعلقات مزید مستحکم بنانے پر اتفاق
باکو( تر کیہ خبر)سربیا کے دورے کے دوران آذربائیجان کی قومی اسمبلی کی اسپیکر صاحبہ غفاروا نے جمہوریہ گھانا کے صدر جان ڈرامانی مہاما سے ملاقات کی۔ملاقات میں آذربائیجان اور گھانا کے باہمی تعلقات کی موجودہ صورتحال اور انہیں مزید فروغ دینے کے امکانات کا جائزہ لیا گیا۔اس موقع پر اسپیکر صاحبہ غفاروا نے گھانا کے ساتھ تعلقات کو آگے بڑھانے میں آذربائیجان کی دلچسپی کا اظہار کرتے ہوئے کہا کہ دونوں ممالک کے درمیان مختلف شعبوں میں تعاون اور روابط کو وسعت دینے کے وسیع امکانات موجود ہیں۔ملاقات کے دوران آذربائیجان اور گھانا کے درمیان سفارتی تعلقات کے قیام اور بین الاقوامی تعاون سے متعلق امور پر بھی تبادلہ خیال کیا گیا۔دونوں جانب سے اقوام متحدہ، غیر وابستہ تحریک اور دیگر عالمی تنظیموں کے پلیٹ فارمز پر آذربائیجان اور گھانا کے درمیان تعاون اور مشترکہ سرگرمیوں کو سراہا گیا۔فریقین نے اس حوالے سے بین الاقوامی سطح پر باہمی حمایت، تعاون اور مشترکہ رابطوں کو مزید مضبوط بنانے کی اہمیت پر بھی زور دیا۔