آذربائیجان مرکزی بینک نے شرحِ سود 6.5 فیصد پر برقرار رکھنے کا فیصلہ کر لیا

باکو( ترکیہ خبر) آذربائیجان مرکزی بینک کی انتظامی کمیٹی نے شرحِ سود کو 6.5 فیصد کی موجودہ سطح پر برقرار رکھنے کا فیصلہ کیا ہے۔بینک کی جانب سے جاری بیان کے مطابق شرحِ سود کی پالیسی میں کوئی تبدیلی نہیں کی گئی، جبکہ شرح سود کے کوریڈور کی نچلی حد 5.5 فیصد اور بالائی حد 7.5 فیصد پر برقرار رکھی گئی ہے۔مرکزی بینک کے مطابق یہ فیصلہ افراطِ زر کی موجودہ اور متوقع شرح، عالمی جغرافیائی و سیاسی کشیدگیوں سے پیدا ہونے والے خطرات، عالمی مالیاتی صورتحال اور ملکی معاشی ماحول کو مدنظر رکھتے ہوئے کیا گیا ہے۔بیان میں مزید کہا گیا کہ مالیاتی پالیسی کے اثرات حقیقی معیشت تک بہتر انداز میں منتقل کرنے کے لیے بھی شرحِ سود کو موجودہ سطح پر برقرار رکھنا ضروری سمجھا گیا۔