آذربائیجان میں سفارتی خدمات کے ملازمین کا پیشہ ورانہ دن منایا گیا
باکو( ترکیہ خبر)آذربائیجان کے سفارتی خدمات کے اداروں کے ملازمین کے پیشہ ورانہ دن کے موقع پر 9 جولائی کو "گلستان" محل میں ایک سرکاری استقبالیہ اور موسیقی پروگرام کا انعقاد کیا گیا۔وزارت خارجہ کے شعبہ اطلاعات کے مطابق سرکاری استقبالیے میں وزارت خارجہ اور متعدد سرکاری اداروں کے اعلیٰ سطحی نمائندوں، قومی اسمبلی کے اراکین، جبکہ آذربائیجان میں تعینات سفارتی مشنز اور بین الاقوامی تنظیموں کے سربراہان اور نمائندوں نے شرکت کی۔تقریب سے آذربائیجان کے وزیر خارجہ جیہون بائراموف، صدر کے معاون اور صدارتی انتظامیہ کے شعبہ خارجہ پالیسی کے سربراہ حکمت حاجی یوف، جبکہ آذربائیجان میں مراکش کے سفیر محمد عادل امبارش نے خطاب کیا۔ مقررین نے سفارتی خدمات کے ملازمین کو پیشہ ورانہ دن کے موقع پر مبارکباد دی اور ان کی ذمہ داریوں میں کامیابیوں کے لیے نیک خواہشات کا اظہار کیا۔تقریب کے دوران آذربائیجان کی متوازن اور عملی خارجہ پالیسی کے نفاذ، قومی مفادات کو عالمی سطح پر آگے بڑھانے اور ان کے تحفظ میں سفارتی خدمات کے اداروں کے ملازمین کے اہم کردار کو اجاگر کیا گیا۔