آذربائیجان اور آئرلینڈ کے تعلقات میں توسیع پر اتفاق

باکو( ترکیہ خبر) آذربائیجان کے صدر الہام علیوف نے آئرلینڈ کی نئی تعینات ہونے والی سفیر کلیئر برونسن سے ملاقات کی، جس میں دونوں ممالک کے درمیان دوطرفہ تعلقات کے فروغ پر تبادلہ خیال کیا گیا۔آذربائیجان کے سرکاری خبر رساں ادارے کے مطابق سفیر کلیئر برونسن نے صدر الہام علیوف کو اپنی سفارتی اسناد پیش کیں، جس کے بعد دونوں رہنماؤں کے درمیان ملاقات ہوئی۔ملاقات کے دوران صدر الہام علیوف نے آذربائیجان اور آئرلینڈ کے درمیان تعلقات کو مزید وسعت دینے کی اہمیت پر زور دیا۔ انہوں نے کہا کہ دونوں ممالک کے درمیان تعاون کو سیاسی شعبے سے آگے بڑھاتے ہوئے سرمایہ کاری اور دیگر اہم شعبوں تک وسعت دی جانی چاہیے۔صدر آذربائیجان نے باہمی شراکت داری کے فروغ کے لیے موجود مواقع پر بھی روشنی ڈالی۔اس موقع پر آئرلینڈ کی سفیر کلیئر برونسن نے باکو آمد پر خوشی اور اعزاز کا اظہار کیا۔ انہوں نے کہا کہ شہر کی تاریخی عمارتوں اور جدید ترقی کا حسین امتزاج انہیں بہت متاثر کن لگا، جبکہ انہوں نے آذربائیجان کو ایک خوبصورت ملک قرار دیا۔