آذربائیجان اور افریقی تنظیم آئی جی اے ڈی کے درمیان تعاون کے فروغ پر تبادلہ خیال

باکو( ترکیہ خبر) آذربائیجان کے نائب وزیرِ خارجہ یالچین رفییف نے افریقی ممالک پر مشتمل بین الحکومتی ترقیاتی ادارے آئی جی اے ڈی کے ایگزیکٹو ڈائریکٹر ورکنے گیبیہو نیگیو سے ملاقات کی۔وزارتِ خارجہ کے مطابق ملاقات میں آذربائیجان اور آئی جی اے ڈی کے رکن افریقی ممالک کے درمیان دوطرفہ تعلقات اور بین الاقوامی سطح پر تعاون کے فروغ پر تبادلہ خیال کیا گیا۔ دونوں فریقین نے مسلسل سیاسی رابطے برقرار رکھنے کے لیے باہمی دوروں اور ادارہ جاتی تعاون کی اہمیت پر زور دیا۔گفتگو کے دوران فریقین نے سیاسی، اقتصادی، تعلیمی، صحت، ماحولیاتی تبدیلی، عوامی خدمات، نقل و حمل اور مواصلات سمیت مختلف شعبوں میں تعاون کے امکانات پر غور کیا۔اس موقع پر علاقائی اور عالمی امور پر بھی خیالات کا تبادلہ کیا گیا اور اس بات پر اتفاق کیا گیا کہ مستقبل میں تعاون کو مزید وسعت دی جائے گی تاکہ مشترکہ مفادات کو فروغ دیا جا سکے۔