اداکار فائزون لو عدالت میں پیش، بچوں کی کفالت کے مقدمے میں تنازع شدت اختیار کر گیا

 باکو(شوبز ڈیسک)امریکی اداکار فائزون لو کو فلوریڈا کی ایک عدالت میں پیش کیا گیا، جہاں وہ وہیل چیئر اور ہاتھوں میں ہتھکڑیوں کے ساتھ پیشی کے لیے پہنچے۔ یہ پیشی ان کی حالیہ گرفتاری کے بعد جاری وارنٹ سے متعلق ابتدائی سماعت تھی۔58 سالہ اداکار، جو فلمیں Elf اور Friday میں اپنے کرداروں کے لیے مشہور ہیں، اس وقت بچوں کی کفالت (چائلڈ سپورٹ) سے متعلق دو توہینِ عدالت کے الزامات کا سامنا کر رہے ہیں۔عدالتی ریکارڈ کے مطابق ان کی سابقہ اہلیہ ٹفنی لی کا مؤقف ہے کہ اداکار پر 2 لاکھ 50 ہزار ڈالر کی واجب الادا رقم ہے، جبکہ انہوں نے کئی عدالتی احکامات کی خلاف ورزی کی اور سالہا سال تک ماہانہ 2500 ڈالر کی ادائیگیاں نہیں کیں۔اداکار کے وکیل نے عدالت میں مؤقف اختیار کیا کہ فائزون لو شدید مالی مشکلات کا شکار ہیں، وہ اس وقت بے گھر ہیں، ایک پرانی گاڑی استعمال کرتے ہیں اور مالی طور پر دوستوں پر انحصار کرتے ہیں۔عدالتی بیان کے مطابق اداکار نے گواہی دی کہ گزشتہ پانچ سال میں ان کی مجموعی آمدن صرف 13 ہزار ڈالر رہی، جبکہ 2025 میں انہوں نے کوئی آمدن حاصل نہیں کی۔دوسری جانب ان کی سابقہ اہلیہ نے ویڈیو کال کے ذریعے الزام عائد کیا کہ اداکار نے مبینہ طور پر کہا تھا کہ وہ ادائیگی سے بچنے کے لیے کام چھوڑ دیں گے اور شوز بھی منسوخ کر دیں گے۔