باکو میں 7.5 ارب ڈالر کے اقتصادی و توانائی معاہدے، امریکا اور آذربائیجان تعاون میں بڑی پیش رفت

باکو( ترکیہ خبر) انرجی ویک اور پہلے آذربائیجان،امریکا اقتصادی ڈائیلاگ کے دوران آذربائیجان کی وزارتِ معیشت اور اسٹیٹ آئل کمپنی (سوقار) نے امریکا، ترکیہ، سربیا، سان مارینو اور فرانس کی مختلف معروف کمپنیوں اور اداروں کے ساتھ متعدد اہم معاہدوں اور مفاہمتی یادداشتوں پر دستخط کیے ہیں، جن کی مجموعی مالیت 7.5 ارب امریکی ڈالر ہے۔آذربائیجان کی خبر رساں ایجنسی کے مطابق ان معاہدوں میں معیشت، توانائی، سرمایہ کاری اور ڈیجیٹل ٹیکنالوجی کے شعبے شامل ہیں، جو دونوں ممالک کے درمیان تعاون کو روایتی توانائی شراکت داری سے آگے بڑھا کر ایک جدید اور کثیر الجہتی اقتصادی شراکت داری میں تبدیل کر رہے ہیں۔پہلے آذربائیجان،امریکا اقتصادی ڈائیلاگ کے پروٹوکول اور اس بڑے مالیاتی پیکج کو دونوں ممالک کے درمیان تعلقات کو ایک منظم، اعلیٰ سطحی اور ادارہ جاتی فریم ورک میں منتقل کرنے کی اہم پیش رفت قرار دیا جا رہا ہے۔ان معاہدوں میں عالمی مالیاتی اور سرمایہ کاری اداروں اور توانائی کمپنیوں کی شرکت بھی شامل ہے، جن میں جے پی مورگن، اپولو گلوبل مینجمنٹ، شیورون اور کومسٹاک ریسورسز جیسی بڑی کمپنیاں شامل ہیں۔ ان اداروں کے SOCAR اور TANAP منصوبے کے ساتھ مالی و تکنیکی تعاون کو آذربائیجان کی معیشت پر اعتماد کا مظہر قرار دیا گیا ہے۔معاہدوں میں ایک اہم دستاویز "اہم معدنیات اور نایاب زمینی عناصر کی پیداوار اور سپلائی کے تحفظ" سے متعلق آذربائیجان اور امریکا کے درمیان فریم ورک معاہدہ ہے۔ اس پر آذربائیجان کے وزیرِ معیشت میکائیل جباروف اور امریکی محکمہ خارجہ کے معاون وزیر برائے اقتصادی، توانائی اور کاروباری امور کیلَب اور نے دستخط کیے۔اس کے علاوہ SOCAR، ٹوٹل انرجیز، ایکس آر جی اور بوٹاŞ کے درمیان "آبشیرون" گیس و کنڈنسیٹ فیلڈ سے پیدا ہونے والی قدرتی گیس کی طویل مدتی فروخت کا معاہدہ بھی طے پایا ہے، جس کے تحت پیداوار کا 50 فیصد (تقریباً 30 ارب مکعب میٹر) آئندہ 15 سال تک ترکیہ کو فراہم کیا جائے گا۔اس معاہدے پر SOCAR کے صدر روؤشن نجمف، ٹوٹل انرجیز کی سینئر نائب صدر مارٹینا اوپیزی، ایکس آر جی کے بین الاقوامی گیس کے صدر محمد ال عریانی اور بوٹاŞ کے ڈائریکٹر عبد الوحید فیدان نے دستخط کیے۔یہ پیش رفت خطے میں توانائی تعاون، سرمایہ کاری کے فروغ اور بین الاقوامی اقتصادی تعلقات میں ایک اہم سنگ میل قرار دی جا رہی ہے۔