شہباز شریف سے بنگلا دیش وفد کی ملاقات، پروازوں کی بحالی پر گفتگو

اسلام آباد… وزیراعظم شہباز شریف سے بنگلا دیش کے مشیر برائے مذہبی امور ڈاکٹر اے ایف ایم خالد حسین نے ملاقات کی، جس میں پاکستان اور بنگلا دیش کے درمیان براہ راست پروازوں کی بحالی سمیت دوطرفہ تعلقات کے فروغ پر تبادلہ خیال کیا گیا۔پی ایم ہاس سے جاری بیان کے مطابق اس موقع پر پاکستان میں بنگلا دیش کے ہائی کمشنر محمد اقبال حسین خان بھی موجود تھے۔ وزیراعظم نے وفد کا خیرمقدم کرتے ہوئے کہا کہ دونوں ممالک کے تعلقات مشترکہ تاریخ، ثقافت اور عوامی وابستگیوں پر قائم ہیں، جنہیں مزید وسعت دینے کی ضرورت ہے۔ انہوں نے تجارتی، اقتصادی اور عوامی سطح پر روابط کے فروغ کو خوش آئند قرار دیا۔وزیراعظم نے نیویارک اور قاہرہ میں ہونے والی ملاقاتوں کا حوالہ دیتے ہوئے چیف ایڈوائزر پروفیسر محمد یونس کی قیادت اور غربت کے خاتمے کے لیے ان کی خدمات کو سراہا۔ڈاکٹر حسین نے بھی پاکستان اور بنگلا دیش کے تاریخی اور برادرانہ تعلقات پر روشنی ڈالتے ہوئے کہا کہ یہ رشتہ مشترکہ عقیدے اور روایات سے جڑا ہوا ہے۔ انہوں نے چیف ایڈوائزر پروفیسر یونس کا خط وزیراعظم کو پیش کیا، جس میں پاکستان میں سیلاب سے جانی و مالی نقصان پر تعزیت اور امداد کی پیشکش کی گئی۔ملاقات میں دونوں ممالک نے براہ راست پروازوں کی جلد بحالی کے امکانات پر بھی بات چیت کی۔ وزیراعظم نے امید ظاہر کی کہ اعلی سطحی وفود کے تبادلوں سے تعلقات مزید مستحکم ہوں گے۔ اس موقع پر وزیراعظم نے چیف ایڈوائزر کو پاکستان کے سرکاری دورے کی دعوت دہرائی، جبکہ بنگلا دیشی مشیر نے وزیراعظم کو بنگلا دیش کے دورے کی دعوت دی۔