پاک چین تعلقات میں بڑی پیشرفت، سی پیک فیز ٹو میں پانچ نئی راہداریوں پر اتفاق

بیجنگ( مانیٹرنگ ڈیسک) وزیراعظم پاکستان شہباز شریف نے بیجنگ میں عوامی جمہوریہ چین کے وزیراعظم لی چیانگ سے ملاقات کی جس میں دونوں ممالک نے سی پیک فیز ٹو کے تحت پانچ نئی اقتصادی راہداریوں پر مل کر کام کرنے پر اتفاق کیا۔وزیراعظم آفس کے مطابق وفود کی سطح پر مذاکرات کے بعد چینی وزیراعظم نے وزیراعظم شہباز شریف کے اعزاز میں ظہرانہ دیا۔ دونوں رہنماں نے پاک چین تعلقات کی مثبت رفتار پر اطمینان کا اظہار کیا اور ہمہ موسمی تزویراتی شراکت داری کو مزید مستحکم بنانے کے عزم کا اعادہ کیا۔اس موقع پر مشترکہ ایکشن پلان 2024 تا 2029 پر دستخط کیے گئے، جسے ایک بڑی پیشرفت قرار دیا جا رہا ہے۔وزیراعظم شہباز شریف نے پاکستان کی علاقائی سالمیت، خودمختاری اور سماجی و اقتصادی ترقی کے لیے غیر متزلزل حمایت پر چینی قیادت اور عوام کا شکریہ ادا کیا۔ انہوں نے کہا کہ پاکستان کی اصلاحاتی کوششوں کے مثبت نتائج چین کی بھرپور حمایت سے ممکن ہوئے ہیں۔ وزیراعظم نے جلد چینی کیپٹل مارکیٹ میں پانڈا بانڈز جاری کرنے کے ارادے سے بھی آگاہ کیا۔شہباز شریف نے سی پیک کو پاکستان کی ترقی کے لیے ریڑھ کی ہڈی قرار دیتے ہوئے قراقرم ہائی وے، ریلوے لائن-1 کی بحالی اور گوادر پورٹ کے جلد فعال ہونے پر زور دیا۔ انہوں نے بتایا کہ بیجنگ میں منعقدہ سرمایہ کاری کانفرنس میں 300 پاکستانی اور 500 چینی کمپنیاں شریک ہوں گی، جبکہ زراعت، کان کنی، ٹیکسٹائل، صنعت اور آئی ٹی کو ترجیحی شعبے قرار دیا گیا ہے۔وزیراعظم نے صدر شی جن پنگ کے گلوبل ڈویلپمنٹ انیشی ایٹو، گلوبل سیکیورٹی انیشی ایٹو اور گلوبل سولائزیشن انیشی ایٹو کی بھرپور حمایت کا بھی اعادہ کیا۔دونوں ممالک نے 2026 میں پاک چین تعلقات کی 75ویں سالگرہ شاندار انداز میں منانے پر اتفاق کیا، جبکہ سی پیک فیز ٹو، سائنس و ٹیکنالوجی، آئی ٹی، میڈیا اور زراعت سمیت مختلف شعبوں میں تعاون بڑھانے کے لیے متعدد معاہدوں اور مفاہمتی یادداشتوں پر دستخط کیے گئے۔