دبئی… انٹرنیشنل کرکٹ کونسل (آئی سی سی) نے ویمنز کرکٹ ورلڈ کپ کے افتتاحی تقریب اور ٹکٹنگ شیڈول کا اعلان کر دیا۔میگا ایونٹ بھارت کے چار شہروں اور سری لنکن دارالحکومت کولمبو میں کھیلا جائے گا، جہاں افتتاحی تقریب کو رنگا رنگ بنانے کے لیے عالمی شہرت یافتہ بھارتی گلوکارہ شریا گھوشال اپنی آواز کا جادو جگائیں گی۔ بھارت اور سری لنکا کے درمیان گوہاٹی میں ہونے والے افتتاحی میچ سے قبل یہ خصوصی پرفارمنس پیش کی جائے گی۔تقریب میں شائقین کو موسیقی، ثقافت اور کھیل کا حسین امتزاج دکھایا جائے گا۔ خصوصی ویژولز اور تھیمیٹک سرگرمیوں کے ذریعے تقریب کو یادگار بنانے کی تیاری کی گئی ہے۔شائقین کے لیے سب سے بڑی خوشخبری یہ ہے کہ اس ورلڈ کپ میں ٹکٹوں کی قیمتیں ریکارڈ حد تک کم رکھی گئی ہیں۔ بھارت میں لیگ میچز کے ٹکٹ صرف 100 روپے سے شروع ہوں گے، جو کسی بھی آئی سی سی ایونٹ کی تاریخ میں سب سے کم قیمت ہے۔ مقصد یہ ہے کہ زیادہ سے زیادہ لوگ گرانڈز کا رخ کریں اور ویمنز کرکٹ کے فروغ میں حصہ ڈال سکیں۔ٹکٹس کی فروخت کا آغاز گزشتہ شام ہو چکا ہے۔ ابتدائی چار روزہ پری سیل ونڈو صرف گوگل پے صارفین کے لیے مختص ہے جو 8 ستمبر شام 7 بجے تک ٹکٹ خرید سکتے ہیں۔ دوسرے مرحلے میں عام فروخت 9 ستمبر رات 8 بجے سے شروع ہوگی، جس میں مزید میچز کے ٹکٹ بھی دستیاب ہوں گے۔
ویمنز ورلڈ کپ افتتاحی تقریب میں شریا گھوشال کی پرفارمنس، ٹکٹ صرف 100 روپے
7
