منی ایپلس کے چرچ اسکول میں فائرنگ، دو بچے ہلاک اور 17 زخمی

وا شنگٹن …امریکی ریاست مینیسوٹا کے شہر منی ایپلس میں ایک چرچ سے منسلک پرائمری اسکول میں فائرنگ کے افسوسناک واقعے نے پورے ملک کو ہلا کر رکھ دیا۔ واقعے میں کم از کم دو کم سن بچے ہلاک اور 17 افراد زخمی ہوئے، جن میں زیادہ تر بچے شامل ہیں۔ فائرنگ کرنے والا شخص پولیس کی جوابی کارروائی میں ہلاک ہوگیا۔واقعہ اینونساییشن کیتھولک اسکول میں پیش آیا، جہاں تقریبا 395 طلبہ زیر تعلیم ہیں اور تعلیمی سال کا آغاز صرف دو دن پہلے ہوا تھا۔ پولیس چیف برائن اوہارا کے مطابق ہلاک ہونے والے بچے آٹھ اور دس سال کے تھے۔ حملہ آور کے پاس رائفل، شاٹ گن اور پستول موجود تھیں۔ پولیس نے اسے انتہائی سفاکانہ اور بزدلانہ عمل قرار دیا۔زخمیوں میں سے 14 بچے ہیں، جن میں سے دو کی حالت تشویشناک ہے جبکہ باقی کو قریبی اسپتالوں میں منتقل کر دیا گیا ہے۔ شہر میں موجودہ صورتحال کے مطابق کوئی فعال خطرہ نہیں ہے، اور والدین کو ہدایت کی گئی ہے کہ وہ اپنے بچوں سے ملنے کے لیے اسکول کے ری یونفیکیشن زون کا رخ کریں۔امریکی صدر ڈونلڈ ٹرمپ نے ٹروتھ سوشل پر کہا کہ وائٹ ہاس صورتحال کی کڑی نگرانی کر رہا ہے اور ایف بی آئی فوری طور پر متحرک ہے۔ یہ واقعہ ایسے وقت میں سامنے آیا جب امریکی کالج کیمپسز پر فائرنگ کے بڑھتے ہوئے واقعات نے ملک میں تشویش پیدا کی ہے۔