غزہ میں خونریز کارروائیاں جاری اسرائیلی فوج کی زمینی تیاریوں نے خطرے کی گھنٹی بجا دی

غزہ…اسرائیلی فوج نے غزہ میں ممکنہ زمینی حملے کی تیاری تیز کر دی ہے اور سرحدی علاقوں میں اضافی فوجی دستے اور ٹینک تعینات کر دیے ہیں۔ اطلاعات کے مطابق سکیورٹی کابینہ کا اہم اجلاس آج ہوگا جس میں نئے فوجی آپریشن کی منظوری دیے جانے کا امکان ہے۔ادھر غزہ پر اسرائیلی فضائی حملے جاری ہیں۔ فلسطینی وزارت صحت کے مطابق تازہ بمباری میں 64 افراد شہید ہوئے جن میں امداد کے منتظر 13 شہری بھی شامل ہیں۔ اب تک شہدا کی تعداد 62 ہزار 819 تک پہنچ چکی ہے جبکہ زخمیوں کی تعداد ایک لاکھ 58 ہزار 629 تک جا پہنچی ہے۔غزہ میں خوراک کی شدید کمی اور قحط کی صورتحال برقرار ہے، جہاں بھوک کے باعث مزید 3 افراد ہلاک ہوئے، جس کے بعد خوراک کی کمی سے ہلاکتوں کی مجموعی تعداد 303 ہو گئی ہے۔