ترکیہ کی آسٹریلیا کے ساتھ تجارت 5 ارب ڈالر تک لے جانے کی کوششیں تیز

ترکیہ …ترکیہ نے آسٹریلیا کے ساتھ تجارتی تعلقات کو فروغ دینے کے لیے رابطوں میں تیزی لانا شروع کر دی ہے، جس کا مقصد دو طرفہ تجارتی حجم کو درمیانی مدت میں 5 ارب ڈالر تک لے جانا ہے۔ آسٹریلیا ان ممالک میں شامل ہے جنہیں ترکیہ کی وزارت تجارت نے “دور دراز ممالک کی حکمت عملی” (Far Countries Strategy) کے تحت ترجیحی فہرست میں شامل کیا ہے۔اس سلسلے میں ترک کاروباری نمائندوں پر مشتمل ایک اعلی سطحی وفد آسٹریلیا کے شہروں میلبرن اور سڈنی میں 30 اگست تک مختلف اجلاسوں میں شرکت کرے گا، جہاں وہ مقامی کمپنیوں کے ساتھ تعاون کے امکانات تلاش کرے گا۔وزارت تجارت کی اس حکمت عملی کے تحت ترکیہ کا مقصد آسٹریلیا کے ساتھ تجارتی تعلقات کے ساتھ ساتھ اقتصادی اور تکنیکی تعاون کے معاہدوں کو بھی وسعت دینا ہے۔تجارتی وفد خوراک، زراعت، آٹوموٹیو، آٹومیشن، فرنیچر، کاسمیٹکس، انڈسٹریل مائننگ، مالیاتی مشاورت، چمڑے کی مصنوعات اور جوتا سازی سمیت مختلف شعبوں میں آسٹریلوی کمپنیوں کے ساتھ شراکت داری کے مواقع کا جائزہ لے گا۔فارین اکنامک ریلیشنز بورڈ (DEK) کے تحت ترکیہ-آسٹریلیا بزنس کونسل کے چیئرمین اسٹیون یانگ نے کہا کہ گزشتہ چند برسوں میں دونوں ممالک کے درمیان تجارتی تعلقات میں مسلسل بہتری آئی ہے۔ ان کے مطابق، ترکیہ کی آسٹریلیا کو برآمدات گزشتہ سال 1.1 ارب ڈالر تک پہنچ گئیں، جو پہلی بار 1 ارب ڈالر کی حد سے تجاوز تھیں۔اسٹیون یانگ کا کہنا تھا، “ہمارا ہدف درمیانی مدت میں باہمی تجارتی حجم کو 5 ارب ڈالر تک لے جانا ہے۔”ترکیہ کی اس نئی پیش رفت کو عالمی سطح پر معاشی روابط کے تناظر میں ایک مثبت قدم قرار دیا جا رہا ہے، جو ایشیا پیسفک خطے میں اس کے تجارتی اثرات کو وسعت دے سکتا ہے۔