بھارتی یوٹیوبر ایلویش یادیو کے گھر پر اندھا دھند فائرنگ، اہل خانہ بال بال بچ گئے

نئی دہلی …بھارت کے معروف اور متنازع یوٹیوبر، بگ باس او ٹی ٹی کے فاتح ایلویش یادیو کے گھر پر نامعلوم افراد نے اندھا دھند فائرنگ کردی۔ واقعہ صبح ساڑھے پانچ سے چھ بجے کے درمیان پیش آیا جب تین موٹرسائیکل سوار حملہ آوروں نے مکان پر دو درجن سے زیادہ گولیاں برسائیں اور فرار ہوگئے۔پولیس کے مطابق گولیوں کے نشانات مکان کی نچلی اور پہلی منزل کی دیواروں پر واضح طور پر دیکھے جا سکتے ہیں۔ خوش قسمتی سے ایلویش یادیو اس وقت گھر پر موجود نہیں تھے، تاہم ان کے اہل خانہ اور کیئر ٹیکر عمارت میں موجود تھے۔ واقعے میں کوئی جانی نقصان نہیں ہوا۔اطلاع ملتے ہی پولیس موقع پر پہنچ گئی، فرانزک شواہد اکٹھے کیے اور علاقے کے سی سی ٹی وی کیمروں کی فوٹیج قبضے میں لے لی۔ حکام کا کہنا ہے کہ اہل خانہ کی باضابطہ شکایت درج ہوتے ہی تحقیقات کو آگے بڑھایا جائے گا۔پولیس ذرائع کے مطابق ایلویش یادیو اس وقت ہریانہ سے باہر ہیں۔ اہل خانہ نے بیان دیا ہے کہ اس واقعے سے قبل انہیں کسی بھی قسم کی دھمکی موصول نہیں ہوئی تھی۔