مسٹر بیسٹ کا نیا عالمی ریکارڈ، ایک کروڑ بیس لاکھ ڈالر عطیہ کر کے دنیا کو حیران کردیا

نیویارک…امریکی یوٹیوبر جمی ڈونلڈسن، جو دنیا بھر میں مسٹر بیسٹ کے نام سے جانے جاتے ہیں، نے ایک اور شاندار کارنامہ سرانجام دیتے ہوئے انسانی ہمدردی کی نئی تاریخ رقم کردی۔مسٹر بیسٹ نے 14 اگست کو لائیو اسٹریم کے دوران ایک کروڑ بیس لاکھ ڈالر (پاکستانی روپوں میں تقریبا ایک ارب چالیس کروڑ روپے) عطیہ کرکے نہ صرف لاکھوں ضرورت مندوں کے چہروں پر امید کی کرن جگا دی بلکہ ایک نیا گنیز ورلڈ ریکارڈ بھی قائم کیا۔یہ لائیو اسٹریم مشہور اسٹریمرز ایڈن روس اور xQc کے ساتھ کِک پلیٹ فارم پر 15 گھنٹے جاری رہی، جس کے دوران عالمی فلاحی منصوبے ٹین واٹر کے لیے خطیر رقم جمع ہوئی۔ اس سے قبل 2021 میں Z Event نے اس طرح کا ریکارڈ قائم کیا تھا۔اس موقع پر مسٹر بیسٹ نے کہا کہ “اس اسٹریم کی بدولت بے شمار زندگیاں بدلنے جا رہی ہیں۔” ان کے اس مشن میں بڑی شخصیات اور ادارے بھی شریک رہے۔ عطیات دینے والوں میں بی لوو الیکٹرولائٹ، فِن بیگز، کِک کے شریک بانی ایڈ کریون، بیجان طہرانی، انفلوئنسر صوفی رین اور اسٹریمر ٹرین ریکٹس ٹی وی شامل تھے، جن میں سے ہر ایک نے کم از کم 10 لاکھ ڈالر عطیہ کیا۔ علاوہ ازیں ڈانا وائٹ، مائیکل روبن، برائن چیسکی، گیری وی اور کیسی واسر مین جیسے بڑے ناموں نے بھی بھرپور فیاضی دکھائی۔لائیو اسٹریم میں دلچسپ اور منفرد سرگرمیوں نے شائقین کو لمحہ بہ لمحہ محظوظ کیا، جن میں لائی ڈیٹیکٹر ٹیسٹ، خطرناک سانپوں کے ساتھ چیلنجز، بال کٹوانے کے مقابلے اور تیل میں کشتی جیسی انوکھی سرگرمیاں شامل تھیں۔جمی ڈونلڈسن عرف مسٹر بیسٹ آج دنیا کے سب سے بڑے یوٹیوبر قرار دیے جاتے ہیں۔ ان کے یوٹیوب چینل کے سبسکرائبرز کی تعداد 422 ملین سے تجاوز کر چکی ہے جبکہ ان کی کئی ویڈیوز 500 ملین ویوز سے بھی زیادہ حاصل کر چکی ہیں۔ یوٹیوب کے ساتھ ساتھ وہ اپنی فاسٹ فوڈ چین اور مختلف کاروباری منصوبوں کے ذریعے بھی شہرت اور اثر و رسوخ بڑھا رہے ہیں۔جون 2025 میں مسٹر بیسٹ وہ پہلے انفرادی تخلیق کار بنے جنہوں نے 400 ملین سبسکرائبرز کا سنگِ میل عبور کیا، جبکہ اسی سال وہ تھریڈز پلیٹ فارم پر ایک ملین فالوورز حاصل کرنے والے بھی پہلے شخص قرار پائے۔