تجارتی سپلائی چین کے لیے ویزا اور کسٹمز عمل آسان بنایا جائے، ترک وزیر

برسلز ( ترکیہ خبر) ترکیہ کے وزیر ٹرانسپورٹ و انفراسٹرکچر عبدالقادر اورال اوغلو نے عالمی سپلائی چین میں تاخیر سے بچنے کے لیے ٹرانسپورٹ کارکنوں کے ویزوں کے جلد اجرا اور کسٹمز کے طریقہ کار کو آسان بنانے پر زور دیا ہے۔برسلز میں کنیکٹیویٹی ایجنڈا پلیٹ فارم کی افتتاحی تقریب کے بعد صحافیوں سے گفتگو کرتے ہوئے انہوں نے کہا کہ اگر تیار شدہ، فروخت شدہ اور ادائیگی شدہ سامان سرحدوں پر تاخیر کا شکار ہو جائے تو بین الاقوامی تجارت مؤثر انداز میں جاری نہیں رہ سکتی۔عبدالقادر اورال اوغلو نے کہا کہ اگر سڑک اور ریل کے ذریعے مال برداری سے وابستہ افراد کو بروقت ویزے جاری نہ کیے جائیں، کسٹمز عمل آسان نہ ہو اور ڈیجیٹل انفراسٹرکچر قائم نہ کیا جائے تو مکمل ہونے والے تجارتی معاہدے بھی سرحدوں اور ویزا کارروائیوں میں پھنس کر رہ جاتے ہیں۔انہوں نے کہا کہ عالمی تجارت کو فروغ دینے کے لیے انتظامی رکاوٹوں کا خاتمہ اور تجارتی عمل کو مزید سہل بنانا ناگزیر ہے۔ترک وزیر کے مطابق آج کے دور میں دنیا کے تمام ممالک ایک دوسرے پر انحصار کرتے ہیں اور کوئی بھی ملک، خواہ کتنا ہی ترقی یافتہ کیوں نہ ہو، پیداوار اور تجارت میں مکمل خود کفیل نہیں رہا۔انہوں نے زور دیا کہ بین الاقوامی تجارت کو مؤثر بنانے کے لیے تیز رفتار انتظامی نظام اور بہتر سرحدی سہولیات کی فراہمی وقت کی اہم ضرورت ہے۔